Astanada taksi júrgizýshi áielge balaǵat sózder aityp, kólikten shyǵýdan bas tartyp, qoqan-loqy kórsetken er adam 10 táýlikke ákimshilik qamaqqa alyndy, dep habarlaidy ult.kz.
Bul týraly Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty habarlady.
Sotta anyqtalǵandai, oqiǵa elordadaǵy qoǵamdyq tamaqtaný oryndarynyń biriniń mańynda bolǵan. Taksi qyzmetin paidalanǵan azamat A. sapar aiaqtalǵannan keiin júrgizýshi S.-ǵa balaǵat sózder aityp, kólikten shyǵýdan bas tartqan. Sonymen qatar áielge qoqan-loqy kórsetken.
Oqiǵa týraly aqparat politsiiaǵa áleýmettik jelide taraǵan beinejazbadan keiin belgili bolǵan. Sot otyrysynda er adam óz kinásin tolyq moiyndady.
Sot onyń áreketin usaq buzaqylyq dep tanyp, QR ÁQBtK-niń 434-babynyń 1-bóligi boiynsha jaýapqa tartty.
Sottyń málimetinshe, bul bap boiynsha 20 AEK mólsherinde aiyppul salý nemese 5-ten 10 táýlikke deiin ákimshilik qamaqqa alý jazasy qarastyrylǵan.
Sot quqyq buzýshylyqtyń qasaqana jasalǵanyn, qoǵamdyq tártiptiń buzylǵanyn jáne ainalasyndaǵylarǵa qurmetsizdik tanytylǵanyn eskerdi.
Nátijesinde azamat A. 10 táýlikke ákimshilik qamaqqa alyndy.
Sot qaýlysy ázirge zańdy kúshine engen joq.
