2018 jylǵy naýryzdan bastap jeke sý esepteýish quraly joqtar artyq shyǵyndanatyn bolady, dep habarlaidy "Ult aqparat" «Astana sý arnasy» qalalyq kommýnaldyq sharýashylyǵynyń baspasóz qyzmetine silteme jasap.
«Másele tariftiń qymbattaýynda emes, bul sýdy tutynýdy esepteýdiń jańa normasyn paidalanýǵa bailanysty. Jańa ádis ózderi salǵan úide turatyn turǵyndardy sý esepteýish quraldy ornatýǵa itermeleidi. Norma Astana qalasy ákimdiginiń №367-70 qaýlysymen (zań organdarynda 2018 jylǵy 30 qańtarda № 1157 nómirimen tirkelgen) bekitilgen», - delingen habarlamada.
Jańa norma engizilgen soń sýdyń baǵasy 100 protsentke qymbattaýy múmkin. Munyń kópqabatty turǵyn úilerde turatyn, jalpyǵa ortaq sý esepteýish quraldardy paidalanatyn turǵyndarǵa qatysy joq. Tarif ózgerissiz qalady.
«Jańa ádis Qaraótkel, Energetik, «Iýgo-Vostok», Shubar jáne Kóktalda turatyn sý esepteýishi joq 15 myń abonentke qatysty. Esepteýish bolmaǵan jaǵdaida, jan basyna aiyna 10 myń litr sý - norma. Biraq, shyndyǵynda, eshkim onsha sý tutynbaidy. Bir adam aiyna nebári 3-5 tekshe metr jumsaidy. Artyq shyǵyn ne úshin kerek? Al normany táýligine 332 litrden 600 litrge deiin kóterdik», - dep túsindirdi «Astana sý arnasy» baspasóz ortalyǵynyń basshysy Nazgúl Tálipova.
Aldyn ala esepteýlerge qaraǵanda, jeke turǵyn úi ieleri úshin jan basyna shaqqandaǵy sý baǵasynyń ósimi 1500 teńgeni quraidy. Osy norma turǵyndardy jeke esepteýishterdi ornatýǵa itermeleýdiń tiimdi tetigi retinde engizilip otyr. Negizinde esepteýish ornatý árbir tutynýshynyń zańdy mindeti bolyp tabylady.
«Biz turǵyndardyń esepteýish ornatqanyn qalaimyz. Ol qymbat emes, baǵasy 7 myń teńgeden bastalady. Úiine baqylaýshy kelip mazasyn alǵanyn qalamaityndarǵa radiomodýldi esepteýish ornatýǵa keńes beremiz. Baqylaýshy ondai quraldan 10-20 metr aryda turyp-aq málimet ala beredi», - deidi Nazgúl Tálipova.
