Ulttyq akademiialyq kitaphanada Halyqaralyq Túrki akademiiasynyń uiymdastyrýymen Shyńǵys Aitmatovtyń 90 jyldyǵyna arnalǵan halyqaralyq forým ótip jatyr, dep habarlaidy Baq.kz tilshisi.
Zańǵar jazýshy Shyńǵys Aitmatovtyń 90 jyldyǵyna arnalǵan «Aitmatov taǵylymy» atty halyqaralyq forýmǵa Qyrǵyzstan men Qazaqstannyń kórnekti memleket jáne qoǵam qairatkerleri, tanymal ǵalymdary men aqyn-jazýshylary qatysýda.
Forýmdy QR Prezident ákimshiligi ishki saiasat bóliminiń meńgerýshisi Aida Balaeva ashyp, kezdesý baýyrlas eki el arasyndaǵy yntymaqtastyq pen mádeni qarym-qatynasty odan ári damytýǵa septigin tigizetinin atap ótti.
«Búgingi basqosýǵa Alataýdyń ar jaǵynan parlament qonaqtary, akademik ǵalymdar kelip otyr. Shyńǵys aǵanyń kózin kórgen, áriptes bolǵan aǵalarymyz da osynda. Sizderdi Alataýdy birge jailaǵan qos eldiń dostyǵyn nyǵaitý jolyndaǵy eńbekterińiz úshin rizashylyǵymdy bildirgim keledi», - dedi ol.
Osy oraida QR Prezident ákimshiligi ishki saiasat bóliminiń meńgerýshisi forýmda tusaýy kesilgeli otyrǵan kitapqa qatysty óz pikirin bildirdi.
«Búgin Shyńǵys Aitmatov týraly jańa kitaptyń tusaýkeseri ótkizilmek. Uly jazýshynyń ómirinen syr shertetin týyndy Aimatovtanýshylar úshin ǵana emes, qalyń oqyrman úshin de óte qundy eńbek bolaryna senimdimin. Aitmatov shyǵarmalarymen tutas býyn tárbielendi. Onyń naǵyz ómirden alynǵan keiipkerleri men oqiǵalary árbir oqyrmanǵa etene jaqyn. Qalamger týyndylarynyń ózektiligi qazirgi zamanda tipten arta túsedi. Adamnyń jan dúniesiniń tazalyǵy, oiy men isiniń úndestigi, tabiǵatpen úilesimdi bolýy - qazirgi ýaqytta búkil adamzattyń aldyndaǵy problemalar. Tereń filosofiialyq maǵynasy bar Aitmatov týyndylarynyń túpki ideiasy «Rýhani jańǵyrý» baǵdarlamasymen úndesip jatyr. Osyndai uly qalamgerdi halyqaralyq deńgeide ulyqtaý - tutas túrki jurtynyń eldigi men birligine laiyq is», - dedi Aida Balaeva.
Sonymen qatar ol Shyńǵys Aitmatovtyń mereitoiy Qazaqstannan bastaý alýy qazaq-qyrǵyz halyqtary úshin mańyzdy ekenin atap ótti.
«Aitmatovty ulyqtaý arqyly biz baýyrlas qyrǵyz halqyna qurmetimizdi kórsetemiz. Ol shyn máninde sheksiz ári shynaiy qurmet. Biz tamyry bir baýyrlas halyqpyz. Elbasy Nursultan Nazarbaev árqashan qyrǵyz halqyna shynaiy janashyrlyq kórsetip keledi», - dedi QR Prezident ákimshiligi ishki saiasat bóliminiń meńgerýshisi.
Jiynda qos eldiń ziialy qaýym ókilderiniń nazaryna qyrǵyz rejisseri Artyqbai Súiúndúkovtyń «Aitmatov» atty derekti filmi usynyldy.
Keiin Qyrǵyz Respýblikasynyń eks-memlekettik hatshysy, professor Osmanakýn Ibraimovtyń «Aitmatov. Poslednii pisatel imperii» atty kitabynyń tusaýy kesildi.
«Shyńǵys Aitmatov álemdik deńgeidegi jazýshy. Onyń shyǵarmalaryndaǵy basty keiipkerler – qyrǵyz ben qazaq boldy. Osylaisha, ol qazaq pen qyrǵyz halqynyń arasyndaǵy bailanysty odan ári tereńdete tústi. Qazaq halqynyń darhan dalasy oǵan shabyt beretin. Ol biikke umtylatyn. Sondyqmen meniń «Aitmatov. Poslednii pisatel imperii atty kitabymnyń tusaýkeser rásimi Astanada ótip jatqanyna qýanyshtymyn», - dedi Osmanakýn Ibraimov.
Sonymen qatar ol álem moiyndaǵan qyrǵyz jazýshysy týraly jańa kitap qazaq tiline de aýdarylýy múmkin ekenin aityp qaldy.
«Kitabym Shyńǵys Aitmatovtyń ómiri týraly. Qazirgi tańda bul kitap Máskeýde «Jizn zamechatelnyh liýdei» atty seriiamen orys tilinde «Molodaia Gvardiia» baspasynan shyǵady. Qazirgi tańda kitabym basqa tilderge aýdarylyp jatyr. Ol qazaqshaǵa aýdarylady degen úmittemin», - dep túiindedi sózin kitaptyń avtory.
Sondai-aq Halyqaralyq Túrki akademiiasynyń prezidenti Darhan Qydyráli Shyńǵys Aitmatovtyń 90 jyldyǵyna arnalǵan halyqaralyq is-sharalar basqa memleketterde ótkiziletinin jetkizdi.
«Kelesi aptada IýNESKO kóleminde Shyńǵys Aitmatovtyń 90 jyldyǵyn atap ótemiz. Sondai-aq uly jazýshynyń qurmetine arnalǵan jiyndar Ózbekstanda, Túrkiiada jáne basqa da memleketterde ótedi. Al sońǵy shara Bishkekte uiymdastyrylady», - dedi ol.
