Elordada saýda nysandarynyń jumys kestesi ózgerdi.
Nur-Sultannyń bas sanitar dárigeri Janna Pirálieva habarlaǵandai, endi qaýlyǵa sáikes saýda, oiyn-saýyq ortalyqtary, saýda úileri, jabyq jáne azyq-túlik satpaityn bazarlar senbi kúnderi de jumys istei alady.
«20 qarasha kúni Nur-Sultanda № 248 karantindik sharalar týraly jańa qaýly shyqty, oǵan sáikes maska taǵý, áleýmettik qashyqtyqty saqtaý, termometriia, antiseptikter men sanitaizerlerdiń bolýy shart. SOO, saýda úileri men ortalyqtarynyń, jabyq azyq-túlik jáne azyq-túlik emes bazarlardyń jumys kestesine ózgerister engizildi. Endi atalǵan saýda nysandary senbi kúnderi saǵat 09:00-den 20:00-ge deiin jumys isteitin bolady. Biraq monitoringtik toptar karantin jáne shekteý sharalaryn buzý faktilerin anyqtaǵan jaǵdaida, senbi kúnderi olarǵa jumys isteýge tyiym salynady. Jeksenbi kúnderi burynǵysha barlyǵy jabyq bolady. Jumys kúnderi saýda nysandary keste boiynsha 10:00-den 23:00-ge deiin jumys isteidi», - dedi Janna Pirálieva.
Saýda obektilerinde ornalasqan sulýlyq salondary, atele, himiialyq tazalaý, shashtaraz, aiaq kiim jóndeý sheberhanasy siiaqty qosymsha qyzmetter úshin jańa keste engizildi. Bul biznes sýbektileri senbi jáne jeksenbi kúnderi 09:00-den 20:00-ge deiin jumys istei alady.
«Eger demalys kúnderi SOO-da tek sýpermarketter men dárihanalar ashylsa, endi olarǵa qosymsha qyzmet kórsetetin shaǵyn biznes sýbektileri de qosylady», - dep túsindirdi elordanyń bas sanitarlyq dárigeri.
Bul rette saýda obektilerine kelýshiler ǵimarattyń 30%-yn ǵana toltyrýy kerek, iaǵni bir kelýshige tórt sharshy metr tiesili bolýy tiis. Bul normany ǵimarat ákimshiligi de, jalǵa alýshylar da qadaǵalap otyrýy kerek. Eger adamdar kóp bolsa, olar adamdar aǵynyn shekteýi kerek.
Klientter úshin maska taǵý jáne qashyqtyq saqtaý talaby saqtalady. Olardy buzǵan jaǵdaida, jeke tulǵalar jaýapqa tartylady.
