Astanada avtobýs jolaýshylar jańbyr sýynyń kólik salonyna kirip ketkenin videoǵa túsirip alǵan. Adamdar aiaǵyn sý qylmas úshin, biigirek shyǵýǵa májbúr bolypty. Astana LRT málimet bergendei, bul beinejazba jalǵan emes, dep jazady Sputnik agenttigi.
"Bul - montaj emes. Shynymen solai boldy. Avtobýs Momyshuly kóshesindegi tereń kólshikten ótip bara jatqan bolsa kerek. Júrgizýshi sol sheńberdi aiaqtaýǵa tiis boldy, óitkeni jolaýshylardy mejelegen jerine aparyp salý kerek edi. Sodan soń tehnikalyq kómek shaqyryldy. Kólik synbaǵan. Biz problemanyń aldyn alyp, avtobýsty avtoparkke jiberdik. Jelige rezervtegi avtobýs shyqty", — deidi "Astana LRT" JShS qoǵammen bailanys qyzmetiniń basshysy Naýat Azanbaeva.
Aýa raiy qolaisyzdyǵyna bailanysty elordada birqatar avtobýstyń baǵdary ózgertilgen. Sársenbi kúni tańerteń qoǵamdyq kólik ádettegi baǵdarmen qyzmet kórsete bastady.
Astanadaǵy nóser jańbyr – anomaldy qubylys
Azanbaevanyń sózine súiensek, tájiribesi mol qyzmetkerlerdiń ózi elorda avtobýsynyń sýǵa batqan kezin esterine túsire almapty.
Anomaldy nóserdiń saldarymen 140 kólik kúresti, dep habarlady qalalyq ákimdik.
Esterińizge sala ketsek, dúisenbi kúni keshkisin Astanada jaýyn-shashynnyń ailyq mólsheri túsken.
Kei turǵyndar kósheni qaiyqpen júzip ótipti.
Senat spikeri Qasym-Jomart Toqaev Astananyń nóser jańbyrǵa daiyn emes ekenin atap, qala biligin synǵa aldy.
