28 qyrkúiekte Qytaidyń Qazaqstandaǵy Elshiliginde Qytai Halyq Respýblikasynyń qurylýynyń 77 jyldyǵyna arnalǵan resmi qabyldaý ótti, dep habarlaidy ult.kz.
Is-sharaǵa Qazaqstannyń Premer-Ministriniń orynbasary – Ulttyq ekonomika ministri Serik Jumanǵarin, Qytaidyń Qazaqstandaǵy elshisi Han Chýnlin, sondai-aq memlekettik organdardyń, diplomatiialyq korpýs pen qoǵamdyq jáne iskerlik orta ókilderi qatysty.
Qabyldaýdy Qytaidyń Qazaqstandaǵy elshisi Han Chýnlin ashyp, qonaqtarǵa alǵysyn bildirdi. Ol Qytaidyń 77 jyl ishinde eleýli damý jolynan ótkenin aityp, eldiń ekonomikalyq, tehnologiialyq jáne áleýmettik jetistikterine toqtaldy.
Elshiniń aitýynsha, 2025 jyly Qytaidyń ǵylymi-zertteý jáne tájiribelik-konstrýktorlyq jumystarǵa jumsaǵan shyǵyny 4 trillion iýanǵa jýyqtaǵan. Jańa energetikalyq kólikterdi óndirý men satý kólemi 16 millionnan asyp, 5G bailanys bazalyq stantsiialarynyń sany 5 millionǵa jetken.
Han Chýnlin Qazaqstan men Qytai arasyndaǵy qarym-qatynastyń da qarqyndy damyp kele jatqanyn atap ótti. Biyl qańtar-tamyz ailarynda eki el arasyndaǵy taýar ainalymy 37,8 mlrd dollarǵa jetip, ótken jyldyń sáikes kezeńimen salystyrǵanda 23%-ǵa artqan. Dostyq – Moiynty temirjol ýchaskesindegi ekinshi joldyń qurylysy aiaqtalǵannan keiin onyń ótkizý qabileti bes esege ósken.
Elshi eki el yntymaqtastyǵynyń energetika, paidaly qazbalar men kólik salalarynan bólek, aýyl sharýashylyǵy ónimderin óńdeý, mashina jasaý, jasyl energetika jáne tsifrlyq ekonomika baǵyttaryna keńeiip kele jatqanyn aitty.
«Qazaqstan men Qytaiǵa órkendeý, al elderimizdiń halyqtaryna beibitshilik pen baq-bereke tileimin! Qazaqstan men Qytai arasyndaǵy dostyq urpaqtan urpaqqa jalǵasyp, uzaq jyldar boiy myzǵymas bolsyn! Barshańyzǵa zor densaýlyq pen barlyq bastamalaryńyzǵa tabys tileimin!» – dedi elshi sóz sońynda.
Óz kezeginde Qazaqstan Respýblikasy Premer-Ministriniń orynbasary – Ulttyq ekonomika ministri Serik Jumanǵarin Qytai halqyn QHR-dyń qurylǵanyna 77 jyl tolýymen quttyqtady.
Ministr Qazaqstan Qytaidy óziniń basty strategiialyq seriktesteriniń biri retinde qarastyratynyn atap ótti. Onyń aitýynsha, eki el arasyndaǵy yntymaqtastyq ózara senimge, qurmetke, berik dostyq pen ortaq múddelerge negizdelgen.
Serik Jumanǵarin biyl Qazaqstan Prezidenti Qasym-Jomart Toqaevtyń Qytaiǵa jasaǵan sapary aiasynda jalpy quny 15,2 mlrd dollardan asatyn 80-nen astam kommertsiialyq qujatqa qol qoiylǵanyn aitty.
Sondai-aq ol eki el arasyndaǵy taýar ainalymy 48,7 mlrd dollarǵa jetkenin, al Qazaqstandaǵy Qytai investitsiiasy qatysqan 316 investitsiialyq jobanyń jalpy quny 127 mlrd dollardy quraitynyn jetkizdi.
Ministr mádeni-gýmanitarlyq bailanystardyń da mańyzyn atap ótti. 2026 jyl Qazaqstan men Qytai arasyndaǵy mádeniet toǵyspaly jyly retinde ótip jatyr. Osyǵan bailanysty eki el arasynda túrli mádeni is-sharalar uiymdastyrylýda.
«Biz Astana men Beijińniń strategiialyq sipattaǵy qatynastaryn jańa kókjiekke kóterýge basym mán beremiz.
Osy maqsatta eki el arasynda biik jáne joǵary deńgeilerde saiasi, saýda-ekonomikalyq jáne mádeni-gýmanitarlyq salalardaǵy ýaǵdalastyqtardy iske asyrý úshin birlese kúsh-jiger jumyldyrýǵa daiyndyǵymyzdy qýattaimyz.
Jańa altyn «otyz jyldyqtaǵy» yntymaqtastyǵymyz jigerlenip, igi oqiǵalar men tyń bastamalarǵa toly bolyp, ekijaqty jáne kópjaqty salalardaǵy seriktestigimiz laiyqty jalǵasyn tabatynyna senimdimiz» – dedi S. Jumanǵarin.
Qabyldaý barysynda Qazaqstan men Qytaidyń memlekettik ánurandary oryndaldy.
Odan keiin qonaqtarǵa ulttyq bi men án ónerinen kontserttik baǵdarlama usynyldy. Baǵdarlamada dástúrli ónermen qatar zamanaýi tehnologiialar da tanystyryldy. Atap aitqanda, kesh barysynda robottar bi bilep, qonaqtarǵa arnaiy interaktivti qoiylym kórsetildi.
Qytai elshisi bul jylǵy qabyldaýdyń tehnologiialyq mazmunyna arnaiy toqtalyp, robottardyń qatysýymen interaktivti demonstratsiia daiyndalǵanyn aitty. Onyń sózinshe, bul Qytaidyń innovatsiialyq jetistikterin kórsetýge jáne tsifrlyq dáýirdegi yntymaqtastyq múmkindikterin tanystyrýǵa baǵyttalǵan.
Is-shara sońynda qonaqtarǵa arnaiy dastarhan jaiylyp, ulttyq taǵamdar usynyldy. Qonaqtar ózara pikir almasyp, Qazaqstan men Qytai arasyndaǵy yntymaqtastyqtyń túrli baǵyttaryn talqylady.
Qytai men Qazaqstan kelesi jyly diplomatiialyq qatynastardyń ornaǵanyna 35 jyl tolýyn atap ótedi. Elshi Han Chýnlin bul datany ekijaqty bailanystardyń mańyzdy belesi retinde atap, eki eldiń «jańa altyn otyzjyldyǵyn» qalyptastyrýǵa birlesip kúsh salýǵa daiyn ekenin bildirdi.
