Memleket basshysynyń ulttyq tsifrlyq infraqurylymdy damytý jáne azamattardy zamanaýi telekommýnikatsiialyq qyzmettermen qamtamasyz etý jónindegi tapsyrmasyn oryndaý aiasynda Úkimet rezervinen KazSat-3R ǵaryshtyq bailanys júiesin qurý jobasyn júzege asyrýǵa 10,4 mlrd teńgeden astam qarjy bólindi, dep habarlaidy ult.kz.
Joba ulttyq spýtniktik bailanys júiesi men telekommýnikatsiia salasyn damytýǵa baǵyttalǵan.
Qazaqstan Respýblikasynyń Premer-ministri Oljas Bektenov tiisti qaýlyǵa qol qoidy.
Bólingen qarajat qoldanystaǵy KazSat-3 apparatyn almastyratyn jańa KazSat-3R spýtniktik bailanys júiesin jasaýǵa jumsalady. KazSat-3-tiń josparlanǵan paidalaný merzimi 2029 jyly aiaqtalady. Jańa apparat ulttyq spýtniktik bailanys júiesiniń úzdiksiz jumysyn qamtamasyz etedi.
Jobany júzege asyrý spýtniktik bailanys jelileri men teleradio habar taratý júiesiniń turaqty jumysyn qamtamasyz etip, halyq az qonystanǵan jáne shalǵai eldi mekenderde internetke qoljetimdilikti keńeitýge múmkindik beredi. Sonymen qatar aqparattyq qaýipsizdik deńgeii artyp, Qazaqstannyń tehnologiialyq egemendigi nyǵaiady.
Qazirgi tańda KazSat ǵaryshtyq bailanys júiesiniń múmkindikterin elimizdiń iri bailanys operatorlary men memlekettik qurylymdar paidalanady. Júie arqyly teleradio habarlaryn taratý, derekterdi jetkizý, mobildi bailanys jáne internet qyzmetteri kórsetiledi. Júiege 19 bailanys operatory qosylǵan jáne telehabar taratý qyzmetin 2 mln-nan astam abonent paidalanady.
Qazaqstanda telekommýnikatsiia qyzmetteriniń sapasyn arttyrý boiynsha júieli jumystar júrgizilýde. Sońǵy eki jyldaǵy negizgi nátijelerdiń biri – joǵary jyldamdyqty internetke qoljetimdi halyq úlesi 99%-ǵa jetti. Búginde 4,5 myńnan astam aýyldyq eldi meken joǵary jyldamdyqty internetpen qamtamasyz etilgen. Shalǵai jáne qatynaýy qiyn aýmaqtardy bailanyspen qamtý úshin spýtniktik tehnologiialar qoldanylýda. Sonyń arqasynda jerústi infraqurylymyn salý qiyn eldi mekender de internetke qol jetkizýde. Aýyldyq jerlerde talshyqty-optikalyq bailanys jelilerin keńeitý, «Sońǵy mil» jobasyn iske asyrý, 5G jelisin damytý, avtojoldardy mobildi bailanyspen qamtý jáne zamanaýi spýtniktik sheshimderdi engizý siiaqty negizgi jobalardy júzege asyrý arqyly infraqurylymdy damytý qamtamasyz etilýde. Sonymen qatar zamanaýi tsifrlyq qyzmetterge qoljetimdilik te keńeiip keledi: búginde memlekettik qyzmetterdiń 90%-dan astamy onlain formatta kórsetiledi, Qazaqstanda óz sýperkompiýterlik qýattar men QazTech biryńǵai tsifrlyq platformasy iske qosyldy. Bul jasandy intellekt pen tsifrlyq ekonomikany odan ári damytýǵa negiz qalaidy.
Osylaisha, KazSat-3R bailanys spýtnigin jasaý jáne Jerdi qashyqtan zondtaý salasyndaǵy jańa jobalardy júzege asyrý Qazaqstannyń ǵarysh salasynyń odan ári damýyna jáne onyń tehnologiialyq áleýetiniń artýyna yqpal etedi.
