Foto: azh.kz
Astanadaǵy Ózbekstan Respýblikasy elshiligi ǵimaratyna mas kúiinde basa kóktep kirip, múlikterdi qiratqan elorda turǵyny bas bostandyǵynan aiyryldy, dep habarlaidy QazAqparat qalalyq sottyń baspasóz qyzmetine silteme jasap.
Elordanyń Almaty aýdanynyń №2 soty M. esimdi azamatqa aiyptaý úkimin shyǵardy.
«Biyl qańtarda M. mas kúiinde Ózbekstan Respýblikasy elshiliginiń ǵimaratyna kirip, múlikterdi qiratty. Saldarynan elshilikke iri kólemde materialdyq shyǵyn keldi. Aiyptynyń kinási dálelder men beinebaqylaý kamerasy jazbasymen rastaldy», - delingen qalalyq sottyń habarlamasynda.
Vedomstvonyń aqparatynsha, zań boiynsha aiyptyǵa 3 myńnan 7 myńǵa deiin AEK kóleminde aiyppul salý nemese 3 jyldan 7 jylǵa deiin bas bostandyǵynan aiyrý jazasy qaralǵan.
Sondai-aq, atalǵan is boiynsha jazany jeńildetetin jaǵdai joq, kerisinshe mas kúiinde qylmys jasaý aýyr mán-jai dep tanyldy.
«Sot úkimimen M. esimdi azamat Qylmystyq kodekstiń 202-baby 2-bóliginiń 5-tarmaǵy boiynsha kináli dep tanylyp, 3 jylǵa bas bostandyǵynan airyldy. Sondai-aq, aiypty Ózbekstan Respýblikasy elshiligi ǵimaratyna keltirgen materialdyq zalaldy ótedi. Odan bólek, sottalýshyǵa jazasyn óteý ornynda maskúnemdikten májbúrlep emdeý sharasy belgilendi», - deidi Astana sotynan.
Sot úkimi zańdy kúshine endi.
