Frantsýzdyq Vinci qurylys kompaniiasy onkologiia salasyndaǵy álemdik liderlerdiń biri Pittsbýrg Ýniversitetiniń meditsinalyq ortalyǵymen birge (the University of Pittsburgh Medical Center) osy jyly kóktemde Astanada Ortalyq Aziiadaǵy iri onkologiialyq ortalyqtyń qurylysyna kirisedi, dep habarlaidy elorda ákimdiginiń resmi saity.
«Bul nysannyń biregeiligi onyń rakty emdeý salasyndaǵy tehnika men ǵylymdaǵy sońǵy jetistikterge sai bolýynda. Zamanaýi keshen aýrýhana, emhana, qonaqúidi biriktiretin bolady», - deidi Vinci filialynyń Astanadaǵy basshysy Timýr Djabýa.
Ol mundai qurylysty salýdyń ideiasy memleket basshysyna tiesili ekenin, 2011 jyly respýblikada álemdik standartqa sai meditsinalyq klaster qurý týraly tapsyrma bergenin aita ketti.
Osy bastamanyń aiasynda Qazaqstan astanasynda Ulttyq onkologiialyq ortalyqtyń qurylysy týraly sheshim qabyldandy. Tapsyrys berýshi bolyp «Nazarbaev ýniversiteti» shyqty. Olar keńes berýge rakty emdeý salasyndaǵy kóshbasshy - Pittsbýrg ýniversitetiniń Meditsinalyq ortalyǵyn shaqyrdy. 2016 jyly frantsýzdyq Vinci halyqaralyq tenderde Astanadaǵy ortalyqtyń qurylysyn salýdy jeńip aldy.
«Bizdiń mindetimiz Ortalyq Aziiadaǵy jańa ortalyqtyń ýaqyt óte kele óz qadamyn jaimenen alǵa jyljytý. Sol sebepti, tehnologiialyq jabdyqtaýǵa kóp kóńil bólinýde, iaǵni bolashaqta Pittsbýrg meditsinalyq ortalyǵymen onlain rejimde jumys istei alýyna, sondai-aq osyndai iri eýropalyq ortalyqtarmen de bailanys ornatý. Budan basqa, jańa meditsinalyq keshen onkologiia salasynda halyqaralyq normativke sai bolýy tiis», - dep túsindirdi Timýr Djabýa.
Frantsýzdyq kompaniia jobany iske asyrý úshin óziniń tańdaýynda qazaqstandyq Bi Groupqa toqtady.
«Jobalaý qazir aiaqtalýdyń aldynda tur, sáýirdiń sońy men mamyrdyń basynda qurylystyń birinshi kezeńin bastaimyz, iaǵni irgetasy qalanady», - dedi T. Djabýa.
Ulttyq ǵylymi onkologiialyq ortalyq Nazarbaev ýniversiteti mańaiy jaqta ornalasady jáne 5 gektardai jerdi alady. Onda emdeýdiń jańa tehnologiiasy, innovatsiia, aldyńǵy qatarly biomeditsinalyq zertteýler júrgiziledi. Ortalyq aimaqta tolyqtai onkologiialyq járdem berýdi qamtamasyz etýi tiis.
