Astanada búginnen bastalǵan Ońtústik Qazaqstan oblysynyń kúnderi aiasynda taýar óndirýshilerdiń «Ońtústik ónimderi» kórmesi ashyldy.
Jiynǵa qatysqan oblys ákimi Janseiit Túimebaev barsha kelýshilerge alǵysyn bildire otyryp, kúngeilik kórme arqyly óńirdiń investitsiialyq jáne týristik áleýetimen tanysýǵa múmkindiktiń mol ekenin aitty.
– Biyl bizdiń elimizde shyn mánindegi ǵajaiyp oqiǵa – Astana EKSPO-2017 halyqaralyq kórmesi ótýde. Bul – tehnikalyq jáne tehnologiialyq jetistikterdi kórsetetin, jańa ideialar men qyzyqty jobalardyń nyshany, indýstriialandyrý simvoly bolyp tabylatyn halyqaralyq kórme. Al búgingi taýar óndirýshiler kórmesi – biz úshin óte mańyzdy oqiǵa. Munda ózimizdiń jetistikterimizdi kórsetip, kópshilikke tanymal etýge, tutynýshylar men óndirýshiler arasynda tyǵyz bailanysty ornatýǵa múmkindik kóp, – dedi Janseiit Qanseiituly.
EKSPO-2017 halyqaralyq mamandandyrylǵan kórmesine kúngeiden jetken tamaq jáne jeńil ónerkásip, mashina jasaý, farmatsevtika jáne qurylys zattary salalarynyń 60-tan astam kásiporny qatysyp jatyr.
Úsh kúnge jalǵasatyn sharada Ońtústiktiń shaǵyn qarjylandyrý ortalyqtary men aýyr jáne jeńil ónerkásipterge qatysty indýstrialdy aimaqtary, áleýmettik-kásipkerlik korporatsiia men kóliktik-logistikalyq aimaqtar, týristik aqparattyq ortalyqtardyń dúńgirshekteri qoiyldy.
Bas qaladaǵy «Beibitshilik jáne kelisim» saraiynda uiymdastyrylyp jatqan kórmege kelýshiler, atap aitqanda, oblysymyzǵa keńinen tanymal kilem ónimderi men shulyq-uiyq buiymdaryn, úige arnalǵan toqyma buiymdardy, kiimder, oqý formalary, sábilerge arnalǵan jiyntyqtardy tamashalap jatsa, birqatar qonaqtar Ońtústikte tigilgen aiaq kiimder men erler kostiýmderin kiip kórip júr.
Munan bólek elordalyq jurtshylyqtyń nazaryna kúngeide jasalǵan transformatorlar, dárilik zattar men meditsinalyq maqsattaǵy buiymdar, meditsinalyq qurylǵylar, qurylys zattary, jihaz, azyq-túlik ónimderi jáne ózge de ónimder usynylýda.
Erekshe aita ketetin jait, kórmege kelýshilerdiń sharada usynylǵan Ońtústik ónimderin naryqtaǵy baǵadan 15-20 paiyzǵa arzan satyp alýǵa múmkindigi bar.
Sondai-aq, Astana qalasyndaǵy etnoaýylda Ońtústik Qazaqstan oblysy kúnderiniń sheńberinde óńir qolónershileriniń qundy shyǵarmalarynan jasaqtalǵan «Qutty ólke qolóneri» atty kórme ótýde.
Halyqaralyq kórmes aiasynda ótkizilip otyrǵan mádeniet kúnderinde oblystyń qolónershileri toqyma, syrmaq syrý, keste tigý, áshekei buiymdar, aǵash buiymdaryn árleý, ismerlik, ustalyq syndy qolóner buiymdaryn ázirlep kópshiliktiń nazaryna usyndy. Sonymen birge, ulttyq mádenietti nasihattaýdy kózdegen ońtústikqazaqstandyq qolónershiler men sýretshilerdiń tól týyndylary jáne óńirdiń tarihi, mádeni kelbetin aiqyndaityn 1500-den astam qundy jádiger nasihattalýda.
Etnoaýyl ortalyǵynda «Túrkistan – túrki áleminiń mádeni astanasy» jyly aiasynda ótkizilgen is-sharalar men jýyrda ǵana ońtústiktiń kieli oryndaryn kózben kórip, maily boiaý arqyly órnektegen túrki álemi sýretshileriniń týyndylary da osynda qoiylǵan.
Ulttyq naqyshtaǵy kádesyi buiymdaryn daiyndaityn zańdy jáne jeke tulǵalar ulttyq qolóner týyndylaryn qonaqtarǵa tanystyrsa, 47 qolóner sheberi men 7 sýretshi arnaiy sheberlik sabaqtaryn ótkizip, ulttyq qolóner buiymdaryn ázirleýdiń qyr-syryn jinalǵan kópshiliktiń nazaryna usynady.
Eske salaiyq, Ońtústik Qazaqstan oblysynyń ulttyq qundylyqtardy dáripteitin kórme 29 tamyz ben 3 qyrkúiek aralyǵynda kúndelikti saǵat tańǵy 10:00 men keshki 20:00-ge deiin ótkiziletin bolady.
OQO ákiminiń baspasóz qyzmeti
