Elordalyq áiel balasynyń múgedektigine dárigerlerdi kinálady. Qazir dárigerlerdiń ústinen qyzmettik tekseris júrip jatyr, dep habarlaidy QazAqparat.
Astanalyq áiel óz shaǵymyn áleýmettik jelide anonimdi túrde qaldyrǵan.
Jazbada aitylǵandai, júkti áiel biyl 12 tamyzda elordanyń №1 kópbeiindi aýrýhanasynyń ginekologiia bólimine túsken.
Aitýynsha, dárigerler patsienttiń ótinishine qulaq aspai, jumysyna nemquraily qaraǵan. Osylaisha dárigerlerdiń salǵyrttyǵynan balam múgedek bolyp qaldy dep shaǵymdanady ol.
«Bosanǵannan keiin ulym reanimatsiiada - 10 kún, patologiiada - 10 kún jatty. Olar balany óte kóp márte rentgenge túsirdi. Men ulymnyń oń qolyn burap alǵanyn baiqadym. Diagnoz – oń qoldyń sal aýrýy Diýshen-Erba. Bul - akýsherlik paralich. Náresteniń iyǵynan tartqanda onyń júikesine zaqym kelgen. Balama endi ómir boiy ońaltý men jattyǵý qajet bolady. Ulymnyń deni saý bolǵan. Júktilik kezinde dárigerdiń nusqaýlyǵyn oryndap, tekserýge ýaqytynda bardym. Meniń kópten kútken sábiim dárigerlerdiń kinásinen múgedek boldy», - dep jazdy avtor.
Atalǵan jaitqa Astana qalasy qoǵamdyq densaýlyq saqtaý basqarmasy resmi túsinik berdi.
«Qazir atalǵan jaǵdaidyń mán-jaiyn anyqtaý úshin qyzmettik tergeý júrgizilip jatyr. Eger ótinishte kórsetilgen faktiler rastalsa, kináliler jaýapqa tartylady», - deidi vedomstvodan.
