Foto: Gov.kz
Astanada Qazaqstan Respýblikasynyń Memlekettik rámizder kúni qarsańynda «Ustanym» ulttyq pikirtalas klýbynyń kezekti otyrysy ótti. Jiyn «Memlekettik rámizder: biriktirýshi kúsh jáne zamanaýi mán-maǵyna» taqyrybyna arnaldy, dep habarlaidy Ult.kz.
Is-sharaǵa QR Parlamentiniń depýtattary, ortalyq memlekettik organdardyń ókilderi, belgili ǵalymdar, úkimettik emes uiymdar men jastar uiymdarynyń kóshbasshylary, sondai-aq halyqaralyq sarapshylar qatysty.
Kezdesýde Memlekettik Tý, Eltańba jáne Ánurannyń ulttyq biregeilikti qalyptastyrý, el birligin nyǵaitý jáne azamattyq sanany oiatýdaǵy róli keńinen talqylandy. Spikerler memlekettik rámizder tarihi kezeńderde eldiń tutastyǵyn saqtap qalýǵa yqpal etip, urpaqtan urpaqqa táýelsizdik, patriotizm jáne jaýapkershilik qundylyqtaryn jetkizetin simvol ekenin atap ótti.
Otyrys aiasynda qatysýshylar rámizderdi jastar arasynda nasihattaýdyń jańa tásilderi týraly pikir almasty. Ásirese, bilim berý jáne aqparattyq quraldardy jańǵyrtý, tsifrlyq, mádeni keńistikte memlekettik rámizderdiń zamanaýi qoldanysyn arttyrý máseleleri kóterildi.
Qatysýshylar bul úderisti ótken men búgindi sabaqtastyryp, patriotizmdi sanaly tańdaý retinde qalyptastyrý joly dep baǵalady.
Jiyn qorytyndysy boiynsha memlekettik rámizderdiń tárbielik, mádeni jáne aqparattyq saiasattaǵy ornyn kúsheitýge baǵyttalǵan naqty usynystar ázirlendi. Bul bastamalar ulttyq sana men azamattyq belsendilikti arttyrýǵa baǵyttalǵan kelesi qadamdardyń negizine ainalady.
Aita keteiik, «Ustanym» pikirtalas klýbynyń bul jolǵy otyrysy «ADAL AZAMAT – BELSENDI QOǴAM» azamattyq qoǵamdy damytý ortalyǵy qyzmetiniń strategiialyq seriktestigi aiasynda uiymdastyryldy.
