Astanada kýáger taǵy bir liftiniń qulap ketkeni jaily aitty, - dep habarlaidy kaz.tengrinews.kz tilshisi.
Onyń aitýynsha, tótenshe jaǵdai bul joly "Ýspeh" turǵyn úi kesheninde bolǵan.
"Biz túski úzilisten keiin shyqqan edik. 8-qabatta liftke bir jigitpen kirdik. 3-qabatqa jetken kezde lift birden 1-qabatqa túsip ketti. Sodan biz jekemenshik páter ieleriniń kooperativine qońyraý soqtyq, 40 minýttai kúttik. Sosyn liftshi keldi", - dedi kýáger Zere Mádieva.
Sondai-aq, ol sońǵy aptada turǵyn úide tek bir liftiniń jumys istegenin aityp ótti.
"Bizdiń úide eki lift bar. Bireýi sońǵy apta jumys istegen joq, qońyraý soqpaǵan jerimiz qalmady. Ótinish qaldyrǵan joqpyn ázirge. Ne isterimdi bilmei turmyn, áli dirildep turmyn. Bul oqiǵa osydan 15-20 minýt buryn ǵana boldy", - deidi kýáger.
Onyń aitýynsha, bul úige "Sáttilik" JShS kompaniiasy qyzmet kórsetedi.
"Jekemenshik páter ieleriniń kooperativine bardym. Olar bizdiń kóp shaǵymdanatynymyzdy aitty. Ózimdi jaman sezindim. Bireýi de jedel-járdem shaqyrǵan joq", - deidi kýáger.
Eske salaiyq, 13 sáýirde "Edem Palas-2" turǵyn úi kesheninde ishinde 7 adamy bolǵan lift qulap ketken edi. Abyroi bolǵanda, sol jaǵdaidan eshkim zardap shekken joq, keiin elordalyq IID-niń baspasóz qyzmetindegiler osy derek boiynsha sotqa deiingi tergeýdiń bastalǵanyn habarlaǵan.
Al 21 sáýirde dál sol turǵyn úi kesheninde úidiń bir turǵyny mingen lift 17-qabattan qulady. Qosymsha arqan ǵana qurylǵyny 8 qabatta toqtatýǵa múmkindik bergen.
