Astanada analar jinalyp, ózderiniń bilikke talaptaryn qoidy. Olarmen kezdesýge bilik tarapynan Astana qalasy ákiminiń orynbasary Ermek Amanshaev shyqty.
Aqpannyń 6-sy kúngi jiyn "Astana" kontsert zalynda ótti. Jinalǵan adamdar kezek-kezegimen óz talaptaryn bildirgen. Olardyń keibiri ózderin kópbalaly ana retinde tanystyrǵan. Arasynda ózderin "Altyn alqa", "Kúmis alqa" iesi ekenin aitqandar bar. Shyǵyp sóilegenderdiń keibiri múgedek balalary bar ekenin aitqan.
Jinalǵan adamdar negizinen baspana jaǵdaiy men balalarǵa tólenetin járdemaqy máselesin qozǵaǵan."Bul jerdegi bizdiń barlyǵymyzǵa ortaq másele – baspana. Árqaisymyz birneshe bala ósirip otyrǵan anamyz, bizge úi berilsin!" dedi sóilegenderdiń biri.
Jiynda sóz alǵan Sholpan Qyrǵyzbaiqyzy Qazaqstan prezidenti Nursultan Nazarbaevqa analardyń atynan jazylǵan hatty oqydy. Onda bilikten Qazaqstanda árbir balaǵa myń ailyq eseptik kórsetkish kóleminde bir jolǵy áleýmettik kómek, bala kámelet jasyna jetkenshe eń tómengi kúnkóris minimýmy kóleminde, al kishkentai balamen otyrǵan anaǵa eń tómengi eńbekaqy kóleminde járdemaqy tólensin degen talaptar aitylǵan. Úsh balasy bar otbasylardy baspanamen qamtamasyz etýdi, al tórt jáne odan kóp balasy bar otbasylarǵa tegin baspana berýdi talap etken.Ózderi qoiǵan talaptyń qarastyrylýyna jeti kún mursat beretinin aitqan.
Astana ákiminiń orynbasary Ermek Amanshaev jiynda aitylǵan máselelerdiń "zań júzinde qarastyrylatynyn" aitqan.
Jiynǵa kelgenderdiń biri óz talaptary oryndalǵansha udaiy osylai jinalyp turatynyn aitqan.
Almatyda da analar óz máselesin kóterip qala ákimdigine barǵan. Ákimdik ǵimaratyna kelgen birneshe adamdy sheneýnikter ishke kirgizgenimen jýrnalisterdiń kirýine ruqsat etpegen.
Azattyq tilshisiniń oqiǵa ornynan habarlaýynsha, sheneýnikter ishke kirgizip alǵandardyń arasynda buǵan deiin Astanada bes balanyń ajalyna sebep bolǵan jeke úidegi órtten keiin áleýmettik jelide ana men balany qorǵaý týraly aktsiia ótkizý týraly bastama kótergen belsendiler de bolǵan.
Analar Shymkent qalasy ákimdigine de barǵanymen, ákimdik ruqsat etse de ishke kirmei jarty saǵattai syrtta turyp tarap ketken. Munda qala ákimdigin politseiler kúzetip tur. Olardyń arasynda azamattyq kiimde júrgender de bar. Kúzetip turǵandar ákimdik ǵimaratyna jaqyn kelgen qarapaiym azamattardy tekserip, qandai máselemen júrgenin surastyryp jatyr. Ákimdik aldyndaǵy Túrkistan saraiy janynda bir top qaýipsizdik kúshteri mingen avtobýs tur. Politseilerdiń aitýynsha, ákimdik aýmaǵynda arnaiy reid júrgizilip jatyr. Alaida bul sharanyń qandai maqsatta júrgizilip jatqany aitylmaidy
4 aqpanǵa qaraǵan túni Astananyń Kóktal-1 shaǵyn aýdanynda jeke úidiń aýlasyndaǵy ýaqytsha baspana órtenip, bir otbasyndaǵy 2006, 2008, 2013, 2015 jáne 2018 jyly týǵan bes qyz bala opat bolǵan. Qaza bolǵan balalar 5 aqpanda jerlendi. Jergilikti biliktiń dereginshe, órt balalardyń ata-anasy jumysta bolǵan kezde bolǵan. Otbasy kóp balaly shańyraq retinde tirkeýde turǵan.
