Foto: ashyq derekkóz
Áleýmettik meditsinalyq saqtandyrý qorynyń qarajatyn jymqyrý deregi boiynsha Astana qalasy boiynsha Qarjylyq monitoring agenttiginiń departamenti prokýratýranyń úilestirýimen sotqa deiingi tergep-tekserý júrgizip jatyr, dep habarlaidy Ult.kz.
Vedomstvo málimetinshe, 2022 jyly Qor men eki jekemenshik klinika arasynda jalpy somasy 2,4 mlrd teńgege meditsinalyq qyzmet kórsetý týraly kelisimsharttar jasalǵan. Atalǵan sharttar aiasynda jyljymaly meditsinalyq poiyz arqyly qyzmet kórsetý de kózdelgen.
Alaida joba iske qosylǵannan keiin klinikalar basshysy alaiaqtyq shema uiymdastyryp, meditsinalyq kómek kórsetilmegen patsientter týraly aqparattyq júiege ádeii jalǵan málimetter engizgen. Jalǵan diagnozdar qoiylyp, shyn máninde kórsetilmegen qyzmetter tirkelgen.
Tergeý derekterine sáikes, kún saiyn jalǵan túrde tirkelgen patsientter sany 90-nan 150 adamǵa deiin jetken. Sonyń saldarynan klinikalar naqty kórsetilmegen meditsinalyq qyzmetter úshin ÁMSQ qarajatynan zańsyz 682 mln teńge alǵan.
2024 jyldyń qańtar aiynda qylmystyq jolmen alynǵan tabystyń bir bóligi — 364 mln teńge — kúdiktiniń jáne onyń jubaiynyń jeke esepshottaryna aýdarylǵany anyqtaldy.
Kúdikti qamaýǵa alyndy. Sot sanktsiiasymen onyń múlkine, atap aitqanda Ispaniiadaǵy qala syrtyndaǵy úiine, Astanadaǵy páterine jáne avtokóligine tyiym salyndy.
Qazirgi ýaqytta tergep-tekserý jumystary jalǵasyp jatyr.
