Astana ákimi Áset Isekeshev Qabanbai batyr dańǵylyn qaita jóndeý máseleleri boiynsha kóshpeli keńes ótkizdi. Qazirgi kezde bul jaǵdai elorda turǵyndary men qonaqtaryna yńǵaisyzdyqtar keltirip otyr. Keńes qorytyndysy boiynsha avtomobil joldary, kólik basqarmalary, IID men qalalyq kásiporyndardyń arasyndaǵy jumystyń tiisti deńgeide úilestirilmegeni úshin Astana ákimdiginiń birqatar laýazymdy tulǵalary tártiptik jazaǵa tartyldy, - habarlaidy "Ult aqparat" qala ákimdiginiń baspasóz qyzmetine silteme jasap.
Osy salaǵa jetekshilik etetin qala ákiminiń orynbasary Qosman Aitmuhametovqa eskertý jasaldy.
Ákim Avtomobil joldary basqarmasynyń basshysy Symbat Myrzaǵulovty qyzmetinen bosatýdy, «Astana Teplotranzit» AQ men «Astana sý arnasy» MKK basshylaryna qatań sógis, «Astana LRT» JShS basshylyǵyna sógis jariialaýdy tapsyrdy.
Astana qalasynyń IID men Jergilikti politsiia qyzmetine tiisti ýchaskelerde qajetti jol belgileri men kórsetkishterdiń qoiylmaýy sebepti týyndaǵan keptelister úshin jaýapty tulǵalardy anyqtap, jazaǵa tartý tapsyryldy.
Qala ákiminiń orynbasary Q. Aitmuhametov barlyq qyzmetterdiń jumysyn jumyldyryp, Qabanbai batyr dańǵylyndaǵy qozǵalysty buryn josparlanǵandai 5 qazanda emes, 20 qyrkúiekke deiin qamtamasyz etýge mindettendi.
«Sizge barlyq quzyret pen múmkindikter berildi. Barlyq jumystardy oqý jyly bastalǵansha aiaqtaýǵa múmkindik boldy. Endi sizderdiń kelispei áreket etýlerińizdiń saldarynan elorda turǵyndary, ata-analar men balalar mektepterge, balabaqshalarǵa, aýrýhanalarǵa jete almai otyr», - dedi Áset Isekeshev.
Keńes barysynda jol salý jumystaryn oryndaýdyń jańa tásilderi, qoǵamdyq kólik máseleleri talqylandy. Elorda turǵyndary men qonaqtaryna qolaily jaǵdai jasaý basty nazarda. Bul rette osy saladaǵy júieli jumystar ústimizdegi jyldyń qyrkúiek aiynyń sońyna deiin ázirlenetin Astanany damytýdyń jańartylǵan baǵdarlamasynda kórinis tabady.
