Foto: Qazaqkontsert
Roza Baǵlanova atyndaǵy «Qazaqkontsert» memlekettik akademiialyq kontserttik uiymynda tanymal kompozitor, Qazaqstannyń eńbek sińirgen óner qairatkeri, «Parasat», «Qurmet» ordenderiniń iegeri Keńes Dúisekeevtiń shyǵarmashylyǵyna arnalǵan «Sálem saǵan, týǵan el» atty mýzykalyq kesh ótedi. Atalǵan kesh kompozitordyń 80 jyldyq mereitoiyna orai uiymdastyrylyp, respýblikalyq deńgeide alǵash ret ótkiziletin is-sharalardyń biri bolyp sanalady.Kontserttik baǵdarlamada kompozitordyń el júreginen oryn alǵan tańdaýly shyǵarmalary oryndalyp, onyń ulttyq ónerge qosqan ólsheýsiz úlesi men taǵylymdy shyǵarmashylyq joly keńinen tanystyrylady. Atap aitqanda, «Sálem saǵan, týǵan el», «Oilaisyń ba, janym», «Dombyra týraly ballada», «Ókinbe sen», «Ǵashyqtar jyry», «Qaraǵym-ai, «Anaǵa hat» jáne t.b. týyndylary kórermen nazaryna usynylady.
Is-sharaǵa Qazaqkontserttiń óner juldyzdary men shyǵarmashylyq ujymdary qatysady: Nurlan Ónerbaev, Jeńis Ysqaqova, Qurmash Mahan, Baýyrjan Isaev, Erbol Tájibaev, Altynshash Muqataeva, Ádiljan Tolyqpaev, Anna Ývarova, Asqar Muqiiat, Ádilhan Makin, Zarina Makina, Erlan Rysqali, Perizat Turarova, Qýandyq Shalqaruly, Asylhan Shalqarov, Alibek Almadiev, Nurai Myqty, Ibrahim Amin, Sultan Ahmet, Aiym Qoǵam, Venera Tabys, «Saz&Soul» toby, «Astana» estradalyq simfoniialyq orkestri, G-bend, «Gulder» ansambli. Sondai-aq, Qazaqstannyń eńbek sińirgen qairatkerleri Sembek Jumaǵaliev, Altynai Jorabaeva, «Astana» estradalyq-simfoniialyq orkestriniń kórkemdik jetekshisi, «Qurmet» ordeniniń iegeri Erjan Isin jáne Resei halyq ártisi, dirijer, djaz pianisi, «Fonograf-Simfo-Djaz» orkestriniń jetekshisi Sergei Jilin óner kórsetedi.
Keńes Dúisekeev - qazaq mýzyka óneriniń altyn qoryna engen biregei týyndylardyń avtory, ulttyq rýh pen zamanaýi áýendi sheber ushtastyrǵan kórnekti kompozitor. Onyń shyǵarmashylyq murasynda «Tolǵaý» simfoniiasy, «Jalańtós batyr» simfoniialyq poema-kartinasy, «O, dúnie» kantatasy, «Jyl mezgilderi» romanstar tsikli, sondai-aq «Jan áke», «Qaraǵym-ai», «Sálem saǵan, týǵan el», «Ókinbe sen», «Ǵashyqtar jyry» jáne t.b. keńinen tanymal mýzykalyq shyǵarmalary bar. Sonymen qatar kompozitor «Mádi», «Aqqý Jibek» miýziklderiniń, «Aldar kóse» operettasy, simfoniia-kontsert pen túrli aspaptarǵa arnalǵan kontsert, kameralyq orkestrge arnalǵan shyǵarmalar men 200-den astam ánniń avtory.
Mýzykalyq kesh kompozitordyń ulttyq ónerge sińirgen zor eńbegin dáriptep, onyń bai ári kópqyrly shyǵarmashylyq jolymen tanystyrady.
