Astana úileriniń biriniń syrtqy qabyrǵasy Qasteev atyndaǵy mýzeiden jinalǵan qazaqstandyq klassikterdiń týyndylarymen tolyqty. Bul jóninde Saryarqa aýdanynyń ákimi Arman Turlybek málim etti, dep habarlaidy QazAqparat tilshisi.
«Mine, Urban Art Astana halyqaralyq kóshe sýret óneri festivali de óz máresine jetti. 15 maýsymda bastalǵan festival qalamyzǵa otandyq jáne sheteldik sýretshilerdiń 8 jumysyn syilady. Astanalyqtar buǵan deiin de kóptegen úilerdiń syrtyndaǵy graffiti ónerimen tanys bolsa, endi Á.Mámbetov kóshesi, 5-úidiń Arbatqa jalǵasqan jeri men Kenesary kóshesinen Abai dańǵylyna deiin oryn alǵan tutastai óner týyndylary qala turǵyndary men qonaqtary úshin jaǵymdy jańalyq boldy. Qalalyq Arbattyń aýmaǵy odan ári keńeiýde. Biz kúni keshe ǵana osy úidi sándep bitip, sońǵy boiaýyn syrladyq», - dep jazdy Astana qalasy Saryarqa aýdanynyń ákimi Arman Turlybek Facebook paraqshasynda.
Á. Qasteev atyndaǵy óner mýzeiinen jinalǵan qazaqstandyq óner klassikteriniń týyndylarymen bezendirilgen úi ashyq aspan astyndaǵy galereia ispettes.
«Bul jerde Tursyn Ábýov, Ábilhan Qasteev, Gúlfairýs Ysmaiylova, Shaimardan Sariev, Ǵani Baianov, Mariia Lizogýb jáne Aisha Ǵalymbaeva syndy tanymal avtorlardyń jumystaryn tamashalai alasyzdar. Onyń ataýy kóp uzamai «Tanymal kartinaly úi» dep atalyp ketetinine senimdimin. Buryn bul aýdan tek keńse ǵimarattary ornalasqan tynysh jer bolsa, endi qala turǵyndary men qonaqtary jii serýendeitin qyzyqty orynǵa ainalary sózsiz», - dedi ákim.
Aita keteiik, Astana qalasy Saryarqa aýdanynyń ákimdigi jáne «Eýraziialyq Mádeni Alians» QB Elordanyń 20 jyldyǵyna arnap 16-30 maýsym aralyǵynda «Urban Art Astana» sýret óneriniń alǵashqy festivalin ótkizdi. Festival barysynda Qazaqstan sýretshileriniń qolynan shyqqan jáne basqa da elderdiń strit-art ókilderi moiyndaǵan sýret óneri kórsetildi. Astanaǵa zamanaýi kóshe mádenietin engizý boiynsha ótken jylǵy nátijeli tájiribeniń jalǵasy retinde biyl jazda sýretshiler Saryarqa aýdanynyń qasbetterin ásemdedi.
Halyqaralyq komissiia men jetekshiler 70-ten asa ótinimniń ishinen 26 nusqany iriktep alyp, halyqtyń daýys berýi arqyly 7 sýret bekitilgen bolatyn.
