Senbi, jeksenbi kúnderi Nur-Sultan qalasynda kúsheitilgen karantin talaptaryn buzǵan turǵyndar kóshe videokameralary arqyly anyqtalyp otyrady, dep habarlaidy "Ult aqparat".
Qazaqstannyń birqatar óńirinde epidemiologiialyq ahýaldyń kúrdelenýine jáne koronavirýs infektsiiasyna shaldyqqandar sanynyń artýyna bailanysty Úkimet janyndaǵy vedomstvoaralyq komissiia 20-21 maýsym kúnderi qosymsha shekteý sharalaryn engizgen bolatyn.
Osylaisha, Nur-Sultan qalasynda demalys kúnderi barlyq saýda, oiyn-saýyq-ortalyqtarynyń, saýda úileriniń, jelilik dúkenderdiń, jabyq azyq-túlik jáne azyq-túlik emes bazarlarynyń, dúkenderdiń jumysy toqtatyldy. Jaqyn mańdaǵy azyq-túlik dúkenine, meditsinalyq qyzmet alýǵa barýdy qospaǵanda, azamattardyń úiden shyǵýyna shekteý qoiylǵan. Qala turǵyndary qyzmetine ruqsat etilgen nysandarǵa jumysqa baryp-kelýine bolady.
Politsiia departamentinen málim etkendei, senbi-jeksenbi kúnderi politseilerdiń qyzmeti kúsheitilgen rejimge kóshirildi.
Nur-Sultan qalasy boiynsha Bas sanitarlyq dáriger talaptarynyń saqtalýyna monitoring úzdiksiz jasalýda. Sonymen qatar bul jumystarǵa iKOMEK monitoring jáne jedel áreket etý ortalyǵy jumyldyrylǵan.
iKOMEK-ke integratsiialanǵan qalalyq videobaqylaý kameralarynyń kómegimen turǵyn úi aýlalaryna, saiabaqtarǵa, skverler men basqa da qoǵamdyq oryndarǵa monitoring jasalyp, karantin talaptaryn buzýshylar anyqtalyp jatyr. Tirkelgen derekter jedel túrde Politsiia departamentine joldanýda. Óz kezeginde tártip saqshylary elorda turǵyndary men qonaqtaryna túsindirý jumystaryn júrgizedi.
«Engizilip otyrǵan shekteý sharalary epidemiologiialyq ahýaldy jaqsartyp, koronavirýs infektsiiasynyń taralýyn báseńdetýge baǵyttalǵanyn aityp ótken jón.
Qalanyń barlyq turǵyndary men qonaqtaryn áleýmettik jaýapkershilik tanytyp, asqan qajettiliksiz úiden shyqpaýǵa jáne sanitarlyq normalardy saqtaýǵa shaqyramyz», - delingen PD aqparatynda.
Senbi, jeksenbi kúnderi elordada dezinfektsiia sharalary júrgiziledi.
Qala ákimi Altai Kólginov dúisenbiden bastap koronavirýs juqtyrǵan naýqastar úshin qosymsha 200 tósek-oryn daiyndalatynyn aitty.
