Astanada ústine qaqpa qulap ketken bala jansaqtaý bóliminde jatyr. Bul týraly elorda ákiminiń baspasóz hatshysy Elvira Júrgenbaeva málim etti, dep habarlaidy QazAqparat tilshisi.
«10 aqpan kúni Astana qalasy ákimdiginiń № 2 qalalyq balalar aýrýhanasyna jedel járdem brigadasymen es tússiz, óte aýyr jaǵdaida 2009 jyly týǵan bala jetkizildi. Balaǵa shuǵyl túrde ota jasaldy», - dedi Elvira Júrgenbaeva.
Onyń aitýynsha, bala jansaqtaý bóliminde jatyr, hali ózgerissiz - óte aýyr.
«Oǵan emdeý sharalary tolyq kólemde júrgizilýde», - deidi ol.
Aita keteiik, 9 jastaǵy ul balalardyń hokkei komandasynyń múshesi. Jattyǵýdan úzilis kezinde balalardyń bir bóligi fýtbol oinai bastaǵan. Sol kezde jas hokkeishiniń ústine qaqpa qulap ketken.
