Foto: Polisia.kz
Aqmola oblysynda týǵan, Astanada ósken qyzdyń taǵdyry nashar orta men nashaqorlyqqa bailanysty kúrt ózgerdi. Bul týraly Qylmystyq atqarý júiesi komiteti habarlady.
Ol esirtki taratqany úshin 10 jylǵa bas bostandyǵynan aiyryldy.
Qyzdyń aitýynsha, bári kolledjge túsken kezde bastalǵan.
— Men bir qyzben tanystym. Ol jii qydyratyn. Birde páterde ótken keshke shaqyrdy. Barsam, jastar, ishimdik, ústelde aq untaq tur. Maǵan da usyndy. Qoryqtym. Biraq «bári jaqsy bolady» dep sendirdi. Qyzyǵýshylyqpen baiqap kórdim, — deidi ol.
Sodan bastap qyz birneshe ai boiy esirtki qoldanǵan. Alǵashqyda dosy ákelip júrgen, keiin ózi internet arqyly izdep tapqan. Ýaqyt óte kele aqsha jetpei, kýrer bolyp, «qaltasha» arqyly esirtki taratýmen ainalysqan.
Kóp uzamai onyń qylmystyq áreketi áshkere boldy. Úiinen 53 gramm, qaltasynan 10 gramm esirtki tabylyp, óz podezinde ustaldy. Tergeý kezinde kinásin moiyndap, isti jeńildetetin jaittarǵa qaramastan, sot ony 10 jylǵa bas bostandyǵynan aiyrý jazasyna kesti.
— Týystarym qatty renjidi. Ásirese, ápkemniń qyzy jylady. Sol sátte bárin túsindim. Aqshanyń bári túkke turmaidy, eger ishki jan-dúnień bos bolsa. Qazir ár kún ózimdi kinálap, qatty ókinemin. Narkotik — táýeldilik. Jaqyndaryńdy oilaý kerek edi. Al men olardy kórýden de qaldym, — deidi ol.
Qazirgi ýaqytta jazasyn № 32 túzetý mekemesinde ótep jatqan qyz bilimin jalǵastyryp, jańa ómir bastaýǵa nietti ekenin jetkizdi.
