Nur-Sultanda koronavirýs juqqan 150 meditsina qyzmetkeriniń 30 paiyzyna virýs jumysta juqqan. Bul týraly Nur-Sultan qalalyq qoǵamdyq densaýlyq saqtaý basqarmasynyń jetekshisi Sáýle Qisyqova habarlady. Onyń aitýynsha, dárigerlerdiń basym bóligine virýs týystarynan nemese kórshilerinen juǵýy múmkin. Arnaiy qurylǵan komissiia faktilerdi zerttep jatyr.
"Bular - koronavirýs infektsiiasy tabylǵan naýqastardy emdeitin statsionar qyzmetkerleri. Qalanyń kez kelgen turǵyny siiaqty olarǵa da virýs otbasy múshelerinen nemese kórshilerinen juǵýy múmkin jáne ondai jaǵdailar da kezdesedi. Biz muny joqqa shyǵarmaimyz" dedi Sáýle Qisyqova.
Buǵan deiin densaýlyq saqtaý ministrligi koronavirýspen kúresip jatqan dárigerlerdiń jalaqysyna 250-850 myń teńge aralyǵynda ústemeaqy qosylatynyn, kásibi mindetin atqarý kezinde koronavirýs juqqan dárigerlerge 2 mln teńge kóleminde saqtandyrý tólemi beriletinin aitqan.
Sáýle Qisyqovanyń aitýynsha, qalada 1893 meditsina qyzmetkeriniń jalaqysyna naýryz aiy úshin ústemaqy qosylǵan.
Virýs juqtyrǵandar sany jaǵynan Nur-Sultan respýblika boiynsha Almatydan keiin ekinshi orynda tur. Sońǵy málimet boiynsha, munda 631 adamnan koronavirýs tabylǵan. 36 paiyzy (229) jazylyp, 14 kúndik karantinge úilerine jiberilgen. Jazylǵandar arasynda 97 jastaǵy turǵyn da bar.
Qazaqstanda barlyǵy 3273 adamnan koronavirýs tabylǵan. 829 adam jazylǵan, 25 adam qaitys bolǵan.
