Astanada burynǵy kúieýiniń qolynan qaza tapqan Jazira Adaýova buǵan deiin turmystyq zorlyq-zombylyqqa ushyraǵanyn aityp, politsiiaǵa birneshe ret júgingen. Alaida marqumnyń týystary onyń shaǵymdary tiisti deńgeide qaralmaǵanyn aityp otyr, dep habarlaidy ult.kz KTK arnasyna silteme jasap.
Qaiǵyly oqiǵa 23 qyrkúiek kúni keshki saǵat 20:00 shamasynda Astanadaǵy turǵyn úi keshenderiniń biriniń aldynda bolǵan.
Jazira kóligin turaqqa qoiyp jatqan kezde, ony ańdyp turǵan burynǵy kúieýi júgirip kelip, kóliktiń esigin ashqan. Sodan keiin rólde otyrǵan áielge birneshe ret pyshaq suqqan. Aýyr jaraqat alǵan áiel oqiǵa ornynda qaza tapqan.
Oqiǵa sáti beinebaqylaý kamerasyna túsip qalǵan. Kúdikti qylmys jasaǵannan keiin oqiǵa ornynan qashyp ketken. Keiin politsiia ony ustady.
Marqumnyń aǵasy Elnur Adaýovtyń aitýynsha, burynǵy kúieýi buǵan deiin de Jazirany ańdyp, kúsh kórsetip, qorqytqan.
«Bir kúni qaryndasym esik aldyna shyqqanda, qolynda telefony da, eshteńesi de bolmaǵan. Kúshtep kóligine otyrǵyzyp, “sóileseiik” dep qala syrtyna alyp ketken. Sol jerde uryp, qylqyndyrǵan. Sol kúni ishimdik iship, mas kúiinde júrgeni úshin politsiia shaqyrdyq. Ustalyp, júrgizýshi kýáliginen jeti jylǵa aiyrylyp, 15 táýlikke qamaldy. Biraq ol tek kólikti mas kúiinde basqarǵany úshin jazalandy. Al buǵan deiin otbasylyq zorlyq-zombylyq kórsetkeni úshin jaýapqa tartylǵan joq», – dedi ol.
Jaziranyń ákesi Ázimbek Birimqulov ta qyzynyń buǵan deiin politsiiaǵa birneshe ret shaǵymdanǵanyn aitty.
Onyń sózinshe, 7 qyrkúiekte burynǵy kúieýi pyshaqpen kelgen.
«Jumysqa keteiin dep kóligin otaldyryp jatqanda, salonyna kirip ketken. Kórshiler shyǵyp, arasha túskende pyshaǵyn tastap, qashyp ketken. Sol kezde de bolǵan jaǵdaidy aityp, politsiiaǵa aryzdandyq. Ol buryn politsiiada jumys istegen, jumystan shyqqanyna eki-úsh ai ǵana bolǵan», – dedi marqumnyń ákesi.
Jaqyndarynyń aitýynsha, Jazira men kúdikti 10 jyldan astam ýaqyt birge turǵan. Keiin aralarynda janjal kóbeiip, zańdy túrde ajyrasqan. Marqumnyń artynda eki balasy qaldy.
Astana qalasy politsiia departamenti kúdiktiniń ustalǵanyn rastady. Ol ýaqytsha ustaý izoliatoryna qamalǵan.
«Kisi óltirý faktisi boiynsha qylmystyq is qozǵaldy. Qazir tergeý júrgizilip jatyr. Oqiǵanyń barlyq mán-jaiy anyqtalýda. Tergeý erekshe baqylaýǵa alyndy», – dedi Astana qalasy PD bastyǵynyń birinshi orynbasary Ábil Ábildin.
Qazir Jazira Adaýovanyń denesine sot-meditsinalyq saraptama júrgizilip jatyr. Marqumdy jaqyn kúnderi týǵan jeri Temirtaýda jerleý josparlanǵan.
Aita keteiik, kúdikti ýaqytsha ustaý izoliatoryna qamalǵan.
