Astanada burynǵy birge turǵan áielin birneshe ai boiy zańsyz ańdyǵan er adamǵa sot úkimi shyqty, dep habarlaidy ult.kz.
Sot materialdaryna sáikes, elorda turǵyny qorǵaý nusqamasynyń talaptaryn elemei, tórt ai boiy burynǵy birge turǵan áieldi qýdalaǵan. Ol jábirlenýshige qaita-qaita qońyraý shalyp, habarlamalar jibergen, turǵylyqty jerine baryp, úiiniń mańynda kútip turǵan jáne balaǵat sózder aitqan.
Osynyń saldarynan áiel óziniń jáne kámeletke tolmaǵan qyzynyń qaýipsizdigi úshin únemi alańdap, qorqynysh jaǵdaiynda ómir súrgen. Onyń jeke qaýipsizdikke jáne erkin qarym-qatynas jasaýǵa degen quqyqtary buzylǵan.
Memlekettik aiyptaýshy sottalýshynyń kinásin tolyq dáleldep, sot oǵan 100 saǵat qoǵamdyq jumys túrindegi jaza taǵaiyndady. Úkim zańdy kúshine endi.
Astana qalasynyń prokýratýrasy stalking – adamnyń erkinen tys bailanys ornatýǵa nemese ony ańdýǵa baǵyttalǵan, kúsh qoldanýmen bailanysty emes zańsyz qýdalaý ekenin eske saldy. Eger mundai áreket eleýli ziian keltirse, zańnamada 50 táýlikke deiin qamaýǵa alý túrindegi qylmystyq jaýapkershilik qarastyrylǵan.
Aita keteiik, Qazaqstanda stalking buryn kóbine jeke másele retinde qarastyrylsa, búginde ol qylmystyq jaýapkershilikke ákeletin quqyqbuzýshylyq retinde tanylǵan.
