Liýbov Syrovatskaia qaitys bolǵan kúieýin joqtap jylap otyr. 60 jastaǵy otaǵasy keshe qarly boran kezinde jumysqa ketip, qaityp oralmaǵan. Sóitse, elektrik bolyp istegen Vladimir ózi turǵan Qoshqarbaev aýylynyń elektr stantsiiasyn teksermek bolǵan eken. Biraq, dúlei daýylda adasyp, úsip ólgen. Endi marqumnyń jesiri, qarly boranda kúieýin májbúrlep jumysqa shyǵarǵan basshylaryn kinálap otyr.
Liýbov Syrovatskaia, R.Qoshqarbaev aýylynyń turǵyny:
- Boran bolǵan soń, kúieýim dalaǵa shyqqysy kelgen joq. Biraq, basshylyq jumystan shyǵasyń dep qorqytypty. Onyń ústine joldasymnyń júregi aýyratyn.Soǵan qaramastan úiden shyǵyp ketti.
Marqumnyń denesin aýyldan 500 metr jerden qyzmettesteri taýyp alǵan. Aitýlarynsha, Vladimir Syrovatskiidi jumysqa shyq dep eshkim qysamapty. Tipti, aýdandyq elektr jelileri mekemesiniń basshysy, elektr stantsiiasyn tekserýdiń qajeti joq edi deidi. Óitkeni, Qoshqarbaev aýylynda birde-bir úidiń jaryǵy sónbegen.
Sergei Gerasimenko, Tselinograd aýdandyq elektr jelileri mekemesiniń direktory:
- Aýa raiyna bailanysty dispetcherge nusqaý bergen bolatynmyn. Iaǵni, aitarlyqtai apat bolmasa, elektrikter eshqaida shyqpaýy kerek dep. Biraq, marqum muny túsinbegen bolar. Jaýapty maman edi. Otbasyna kómek kórsetimiz.
Astanada da daýyldan zardap shekkender kóp. Sońǵy málimet boiynsha, 40-qa jýyq turǵyn túrli jaraqatpen dárigerlerdiń kómegine júgingen. Kóbiniń aiaq-qoly synypty. Al, turǵyn úidiń qurylys materialy basyna qulap, aýyr jaralanǵan bir azamat jansaqtaý bóliminde jatyr. Sondyqtan travmatologiia bólimshesiniń dárigerlerine birneshe kúnnen beri damyl joq.
Talǵat Tutabaev, travmvatolog:
- Jarnama banneri qulaǵan bir adamǵa. Taǵy bir turǵynnyń aiaǵyna qańyltyr túsken. Tórtinshi adam aiaǵyn qaiyryp alǵan. Jeldiń ekpinimen aldyǵa iterilip, ózin ustai almai qulap qalǵan.
Al, 40-qa jýyq ǵimaratqa zaqym kelgen. Iaǵni, qatty jelden úiler men mektep, balabaqsha, aýrýhana syndy mekemelerdiń shatyry ushyp, elektr symdary úzilipti. Ári daýyl 130-dan astam baǵdarshamdy qulatyp, 100-ge jýyq kólikti aǵash pen túrli qurylys materialdary basyp qalǵan.
Elvira Júrgenbaeva, Astana ákimdiginiń baspasóz hatshysy:
- Páter ieleri kooperativimen jáne basqa da turǵyndarmen qazir aýdan ákimdikteri tyǵyz jumys jasap jatyr. Keltirilgen shyǵyndar áli de eseptelip jatyr. Árqaisysy keshegi kúnniń keltirgen zalalyn qaǵaz betine jazyp ótkizýde.
Al, boran basylyp, kún raiy turaqtalǵan soń búgin mektepterde sabaq úzilgen joq. Bir sátke de damyl tappaǵan kommýnaldyq qyzmet bolsa, kóshelerdi boran úrip tastaǵan qardan arshyp úlgere alar emes. Dál qazir kóshelerde eki jarym myńnan astam tehnika júr. Alaida, kómek qoly barlyq jerge jete almai jatyr.
