Foto: pixabay.com
Astanada júrgizýshisiz taksi jolǵa shyǵady. Bul joba biyl kezeń-kezeńimen iske qosylmaq, dep habarlaidy 24.kz.
Pilottyq joba retinde qarastyrylyp otyrǵan júrgizýshisiz taksi aldymen áýejai men Abý Dabi kesheni aralyǵynda qatynaityn bolady. Taksidiń dipetcherlik qyzmeti táýlik boiy jumys isteidi.
Astanada osyǵan bailanysty Jasandy intellekt jáne tsifrlyq damý ministrligi, Kólik ministrligi, Astana qalasynyń ákimdigi men taksi kompaniiasy júrgizýshisiz taksidi damytý jónindegi yntymaqtastyq týraly memorandýmǵa qol qoidy.
Halyqaralyq zertteýler derekterine súiensek, avtonomdy tehnologiialar adam faktoryn azaitý arqyly apattardyń aldyn alyp, kólik aǵynyn ońtailandyrady, ári halyqtyń júrip turýyna, ásirese qozǵalysy shekteýli azamattar úshin qolaily bola túspek.
"Elorda 2026 jyly júrgizýshisiz taksi jobasy iske qosylatyn Qazaqstandaǵy alǵashqy qalalardyń qataryna endi. Ózdiginen júretin avtokólikterdi engizý jobasy aqyldy qala strategiiasy men tsifrly infraqurylymdy damytý aiasynda júzege asyrylady. Pilottyq jobanyń baǵyty aldaǵy ýaqytta belgili bolady. Ázirge Astana halyqaralyq áýejaiynan bastap, Abý-Dabi plaza saýda ortalyǵyna deiingi aralyq dep otyrmyz", - deidi Jasandy intellekt jáne tsifrlyq damý ministrligi komiteti basqarmasynyń basshysy Erbol Ahmetov.
