Foto:gov.kz
Ótken aptada qylmystyq ister jónindegi mamandandyrylǵan aýdanaralyq sot iri alaiaqtyq isi boiynsha úkim shyǵardy.
Almaty, NEGE.
Iste birneshe epizod bar. Alaida bir iske erekshe kózimiz tústi – sottalýshy Sybailas jemqorlyqqa qarsy qyzmet júrgizip jatqan tergeýdi toqtatýǵa kómektesýge ýáde bergen. Ol úshin Antikor basshylyǵyna 40 myń dollar tóleý kerek bolǵan.
2022 jyly Antikor Jańaqorǵan bilim bóliminiń basshysynan biýdjet qarjysyn jymqyrdy dep kúdiktengen. Kúdikke ilingen sheneýniktiń aǵasy Ibragimov isti jabýǵa kómektesetin adamdy izdei bastaidy. Is materialdaryna sáikes, ony 40 jastaǵy Jánibek Bókenovpen tanystyrǵan, ol ózin Sybailas jemqorlyqqa qarsy qyzmettiń qyzmetkerimin dep kórsetip, Oljas Bektenovpen (sol kezdegi Sybailas jemqorlyqqa qarsy is-qimyl agenttiginiń tóraǵasy) jaqsy qarym-qatynasta ekenin, Ashat Jumaǵali kúieý balasy bolyp keletinin aitqan. Sózi nanymdy bolý úshin Bókenov Ibragimovpen birge Sybailas jemqorlyqqa qarsy qyzmettiń ǵimaratyna deiin baryp, onda 20 minýt bolyp, qaita shyqqanda basshylyqpen keliskenin aitqan.
«Bókenov J.B. sybailas jemqorlyqqa qarsy qyzmet basshylyǵymen aǵasyna qatysty qylmystyq isti toqtatýǵa keliskenin habarlaǵan. Ol úshin Sybailas jemqorlyqqa qarsy qyzmettiń basshysy O.A.Bektenovke 40 000 AQSh dollaryn berýi tiis ekenin aitqan», – delingen is materialynda.
2022 jyldyń 20 jeltoqsanynda Ibragimov suralǵan somany aýdarǵan. Sonymen qatar, Bókenov ony 2023 jyldyń sáýir aiyna deiin aldaýdy jalǵastyryp, meiramhananyń shotynan bastap kepilge qoiýǵa, saraptama júrgizýge jáne bultartpaý sharasyn ózgertýge deiin túrli shyǵyndardy tóleimin degen jeleýmen taǵy 46,4 million teńgeni jymqyrǵan. Alaida bul Ibragimovtyń baýyryna kómektespeidi, sot sheneýnikti 8 jylǵa bas bostandyǵynan aiyrdy.
Sottalýshy óz kinásin moiyndamaidy. Ol ózin «Antikordyń» qyzmetkerimin dep tanystyrmaǵanyn, eshkimdi para berýge itermelemegenin jáne eshkimge eshteńe ýáde etpegenin alǵa tartady. Alaida, is materialdarynyń ishinde 2023 jyldyń 13 sáýirinde jasalǵan aýdiojazba bar. Onda Ibragimov Bókenovke: «Sen ony Bektenovke aparǵan joqsyń ba?» dep suraidy, sottalýshy: «Tikelei emes, adamdar arqyly jiberdim» dep jaýap beredi.
Bókenovtiń múlki – Qosshydaǵy páteri men kóligi tárkilenip, 14 jyl 8 aiǵa bas bostandyǵynan aiyryldy.
Onyń ústine, Bókenovtiń Antikorda jumys istemeitini jáne Bektenovpen tanys emes ekeni belgili boldy. Is materialdarynan anyqtalǵandai, ol qarapaiym kúzetshi bolyp shyqty.
