Foto: Qazaqstannyń mádeniet jáne aqparat ministrligi
Ulttyq arhivte qazaqstandyq maidangerler týraly málimetterdi qamtityn "Batyrlarǵa taǵzym" portalynyń tanystyrylymy jáne qujattyq kórme ótti. Batyrlarǵa taǵzym portaly tanystyryldy, - dep habarlaidy Ult.kz.
Mádeniet jáne aqparat ministrligi iske qosqan "Batyrlarǵa taǵzym" saitynda qazirdiń ózinde 678 331 ardager, onyń ishinde 365 Keńes odaǵynyń batyry, 4 eki márte Keńes odaǵynyń batyry jáne 19 "Dańq" ordeniniń kavaleri jáne basqa da erjúrek jaýyngerler týraly keń kólemdi málimetter bazasy men galereiasy bar.
"Portalǵa kún saiyn 100-den asa ótinim kelip túsýde. Sońǵy 2 kúndegi esep boiynsha, veb-portalǵa ardagerlerdiń tizimin engizý boiynsha Astana, Almaty qalalary, Aqmola, Shyǵys Qazaqstan, Túrkistan, Atyraý oblystarynan ótinimder belsendi túsken. Interfeis qajetti aqparatty tabýǵa ǵana emes, sonymen qatar óz ardager týystary týraly derekterdi qosýǵa, jańalyqtarmen tanysýǵa múmkindik beredi", - delingen habarlamada.
Aita keteri, portalǵa jiberilgen málimetter arhiv mamandarynyń arnaiy baqylaýynan soń qoldanysqa enedi.
"Biregei jobaǵa birneshe eldiń qyzyǵýshylyǵy artyp, usynystar túsip jatyr. Atap aitqanda, Resei, Ázerbaijan, Belorýs, Moldova, Qyrǵyzstan, Ózbekstan, Túrikmenstan jáne Ýkrainadan 80-ge jýyq ótinim keldi", - deidi ministrlik.
Is-shara aiasynda "Batyrlarǵa taǵzym" saityndaǵy ardagerlerdiń, sondai-aq ulttyq arhivtiń qorynan alynǵan soǵysynyń ardagerleri Kári Abitov, Táńirbergen Qalihanov, Hamit Erǵaliev, Málik Ǵabdýllin, Ermekqali Serikbaevtyń jeke qujattary men maidannan jazǵan hattary, jalpy 150-ge jýyq qundy derek jurtshylyq nazaryna usynyldy.
Kórmege soǵys ardagerleriniń urpaqtary, memleket jáne qoǵam qairatkerleri, ziialy qaýym ókilderi, stýdentter men oqýshylar qatysty.
