QR Mádeniet jáne sport ministrliginiń uiymdastyrýymen Elordasy – Astana qalasynyń 20 jyldyǵyna jáne Táýelsizdik kúni merekesine orai VII «Altyn dombyra» respýblikalyq aqyndar aitysy ótedi.
Bul jóninde Qazaqstannyń Eńbek sińirgen qairatkeri, «Qurmet» ordeniń iegeri Júrsin Erman, Memlekettik «Daryn» jastar syilyǵynyń laýreaty Dáýletkerei Kápuly, aitysker aqyndar Erkebulan Qainazarov, Meiirbek Sultanhannyń qatysýymen Mádeniet jáne sport Ministrliginiń baspasóz-ortalyǵynda ótken baspasóz konferentsiiasynda belgili boldy.
Ábil Jolamanov, QR Mádeniet jáne sport ministrliginiń Mádeniet jáne óner isteri deportamentiniń direktory: «Astanam, sensiń aibarym» atty dúbirli dodanyń ereksheligi Astananyń jiyrma jyldyǵyna arnalǵandyqtan jiyrma aqyn qatysqaly otyr. Aitystyń maqsaty VII Respýblikalyq aqyndar aitysynda jyl boiy respýblikanyń ár óńirinde ótken aitystardyń jeńimpazdaryn iriktep jyldyń qorytyndy aitysy arqyly biylǵy «Altyn dombyra» iegeri anyqtaý jáne elordamyz Astanannyń 20 jyldyǵyn jyrǵa arqaý etý. Sondai-aq ultymyzdyń uly óneri, maqtanyshy IýNESKO-nyń adamzattyń mádeni murasy qataryna qosylǵan tól ónerimizdi dáripteý bolyp tabylady. Bul jyr dodasynda kesteli jyr, ushqyr oi, sýyrypsalmalyq qabiletimen daralanǵan aqyn biylǵy VII «Altyn dombyra» iegeri atanyp, bes million teńgemen marapattalady. Sóz báigesin Aitys aqyndary men jyrshy-termeshilerdiń Halyqaralyq Odaǵynyń basqarma tóraǵasy Júrsin Erman júrgizedi».
Bul alamanǵa Aibek Qaliev, Rinat Zaitov, Rústem Qaiyrtaiuly, Muhtar Niiazov, Aspanbek Shuǵataev, Erkebulan Qainazarov, Jansaia Mýsina, Meiirbek Sultanhan, Ásem Erejeqyzy, Maqsat Aqanov, Bolatbek Orazbaev, Didar Qamiev, Tólegen Jamanov, Tilegen Ádilov, Nurmat Mansýrov, Shalqarbai Izbasarov, Haziret Berdihan, Syrym Ádilov, Serik Qýanǵan, Ershat Qaiboldin qatarly jyl boiy respýblikanyń ár óńirinde ótken aitystardyń jeńimpazdary ǵana qatysady.
Júrsin Erman, Qazaqstannyń Eńbek sińirgen qairatkeri, «Qurmet» ordeniń iegeri: «Qazaqstan Halqy Assambleiasynyń HHÚ sessiiasynda Elbasy N.Á.Nazarbaev «Barlyq oblystyń ákimdikterine tapsyrma beremin, Aitystardy óńirlerde ótkizińder» dep aitqan bolatyn. Sóz sońynda Nursultan Ábishuly maǵan «Barlyq oblystarda aqyndar aitysyn ótkiz. Eń táýirlerin jyldyń sońynda Astanaǵa jina» dep jeke tapsyrma berdi. Mine, Elbasynyń ózi uiytqy bolýymen, Mádeniet jáne sport ministri Arystanbek Muhamediulynyń qoldaýymen alaman aitys ótkizgeli otyrmyz. Biylǵy aitystyń ádil-qazylar múshelerin jekelei tanystyryp ótkim kelip otyr. Ádil-qazylar músheleri: jazýshy, QR Memlekettik syilyǵynyń laýreaty, Qazaqstannyń eńbek sińirgen qairatkeri, aýdarmashy Qajyǵali Muhambetqaliev, aqyn, QR Memlekettik syilyǵynyń laýreaty, «Parasat» ordeniniń iegeri Nesipbek Aitov, Qazaqstannyń eńbek sińirgen qairatkeri, Aitys aqyndary men jyrshy-termeshilerdiń Halyqaralyq Odaǵynyń Atyraý filialynyń direktory Qoishyǵul Jylqyshiev, Qazaqstannyń Mádeniet qairatkeri, Qazaqstan jazýshylar odaǵynyń múshesi, aitysker aqyn Serik Qaliev, filologiia ǵylymdarynyń doktory, professor, aitysker aqyn Qoilybai Asanov, aitys aqyndary men jyrshy-termeshilerdiń Halyqaralyq Odaǵynyń Batys Qazaqstandaǵy ókili, aitysker aqyn Baýyrjan Haliolla, aitysker aqyn, Aitys aqyndary men jyrshy-termeshilerdiń Halyqaralyq Odaǵynyń Jambyl oblysyndaǵy ókili Ahmetjan Ózbekov. Táýelsiz sarapshylar retinde, Qazaqstanǵa Eńbek sińirgen qairatkeri, aqyn Dáýletkerei Kápuly jáne synshy, Qazaqstan Jazýshylar Odaǵynyń múshesi Ámina Qurmanǵaliqyzy bolady.
Dáýletkerei Kápuly, Memlekettik «Daryn» jastar syilyǵynyń laýreaty: «Memleket basshysy Nursultan Nazarbaevtyń «Uly dalanyń jeti qyry» atty maqalasynda aityp ótken barlyq qundylyqtardy nasihattaýda aqyndardan asqan nasihatshy joq. Aitys ejelden kele jatqan uly muramyz. Qazirgi tańda rýhani jańǵyrýǵa muqtaj bolyp otyrǵanymyzda týra táýelsizdik kúninde ótkizgeli otyrǵan aitystan kúterimiz kóp».
Erkebulan Qainazarov, aitysker aqyn: «Mine, 3 jyldan keiin «Altyn dombyra» elordamyz Astanaǵa oraldy. Biylǵy aitystyń ereksheligi halyqqa endi aty shyǵyp, alaman báigede endi ǵana tanylyp jatqandar óner kórsetpek. Jas ónerpazdarymyzǵa degen janashyrlyq pen úlken qoldaý bolmaqshy bul aitys».
Meiirbek Sultanhan, aitysker aqyn: «Táýelsizdik alǵanymyzǵa 30 jylǵa taqap qaldy. Osy jyldar da birde-bir Mádeniet ministri aitysqa tikelei qatysyp, ózi demeýshi bolǵanyn estimedik te kórmedik te. Biyl ǵana «Jyr arqaýy – Astana» atty aitysta ǵana Ministrdiń ózi tikelei uiytqy bolyp, jeńimpazdardy marapattaǵanyna bárimiz kýáger boldyq. Mine, Táýelsizdik kúnimen tuspa-tus ótkeli otyrǵan alaman aitysta da Arystanbek Muhamediulynyń ózi kórermen bolyp, bizge qoldaý kórsetpekshi».
