Astana ákimi Áset Isekeshev elordadaǵy meningitke qatysty ahýal týraly pikir bildirdi, dep habarlaidy "Ult aqparat" sputniknews.kz agenttigine silteme jasap.
Ákimniń sózine súiensek, juqpaly aýrý baqylaýǵa alynǵan, sol úshin arnaiy meditsinalyq shtab qurylypty. Qalalyq aýrýhanalarda kezekshilik kúsheitildi.
"1414 koll-tsentri táýlik boiy jumys isteidi. Biz profilaktikalyq sharalarǵa nazar aýdaryp jatyrmyz. Halyqty habardar etip, jalpy profilaktika kúsheitildi. Ekinshiden: jedel járdem dárigerleriniń jumysy, aýrýdy aldyn ala anyqtaý maqsatynda ýchaskelik dárigerlerdiń qyzmeti kúsheitildi. Aýrýhanalar daiyn, dári-dármek bar", — dep habarlady qala basshysy "Astana – álem qalasy" ǵylymi-tájiribelik konferentsiiasy barysynda tilshilerge.
Áset Isekeshev buryn jansaqtaý bóliminde jatqan úsh jasar balanyń háli jaqsarǵanyn habarlady. Balaqai qazir palataǵa shyqqan eken.
"Ál-aýqaty tómen otbasylar meningitke qarsy ekpeni tegin ala ma?" degen suraqqa Astana ákimi bul máselege densaýlyq saqtaý ministrligi jaýapty ekenin aitty.
"Taǵy da atap ótsem, qajetti dári-dármek bar. Qandai ekpeniń tegin beriletinin densaýlyq saqtaý ministrligi sheshedi. Búgin bas sanitarlyq dárigerdiń brifingi bolady, solardyń sheshimin kútemiz. Biz óz tarapymyzdan kez kelgen qajetti sheshimdi qabyldaýǵa ázirmiz", — dep oiyn qorytty Áset Isekeshev.
