Astanada akademik Rymǵali Nurǵalidyń qurmetine memorialdyq taqta ornatyldy, dep habarlaidy "Ult aqparat" elorda ákimdigine silteme jasap.
Búgin Astana qalasy ákimdigi men L. Gýmilev atyndaǵy Eýraziia ulttyq ýniversitetiniń uiymdastyrýymen asa kórnekti ádebiettanýshy ǵalym, QR UǴA akademigi, QR Memlekettik syilyǵynyń iegeri Rymǵali Nurǵali turǵan úige eskertkish taqta ornatyldy.
Saltanatty sharaǵa qatysqan elorda ákiminiń orynbasary Ermek Amanshaev akademik Rymǵali Nurǵalidyń qazaq ádebietiniń damýyna jáne shákirt tárbieleýde, Astananyń rýhaniiatyna qosqan úlesi týraly aityp ótti.
«Men de aǵamyzdyń shákirtimin. Rymǵali aǵamyzdyń arqasynda ýniversitet qabyrǵasynda júrip Maǵjannyń óleńderin, Mirjaqyp pen Ahmet Baitursynulynyń eńbekterimen tanysa bastadyq. Aǵamyzdyń qazaq ǵylymyna, órkenietine qosqan úlesi orasan zor. Aǵamyzdyń elordaǵa alǵashqylardyń biri bolyp kóship kelip, osy qalanyń mádenietine, rýhaniiatyna qosqan úlesin atap aitpaý múmkin emes», - dedi Ermek Amanshaev.
Sonymen qatar, ákim orynbasary akademiktiń jetekshilik etýimen kezinde kandidattyq diplomyn qorǵaǵanyn aityp ótti.
Rymǵali Nurǵali qazaq teatry men dramatýrgiiasynyń tarihy, A. Baitursynov, M. Jumabaev, J. Aimaýytov, M. Áýezov jáne basqa da qazaq ádebieti klassikteriniń shyǵarmashylyǵy týraly irgeli monografiialyq eńbekter jazdy.
«Bul is-sharanyń tálimdik, tanymdyq, tárbielik máni zor. Aǵamyz ǵylymǵa yntasy bar ár qazaqtyń balasyna qamqor bola bildi. Ádebiettegi eńbegi bir bólek aǵamyzdy teatrtanýshy dep tolyq aita alamyz. Aǵamyz Almaty tórinen Astanaǵa kelgendegi maqsaty - elordaǵa qazaqi rýhty engizý, onyń tarihy men dástúrin osy qalaǵa sińirý boldy. Qaladaǵy dańǵyldar men kóshelerge berilgen tamasha ataýlarda da aǵamyzdyń qoltańbasy bar», - dedi Eýraziia ulttyq ýniversitetiniń rektory Erlan Sydyqov.
Sharaǵa sondai-aq akademik Seiit Qasqabasov, teledramatýrg Sultan Orazalin, R.Nurǵalidiń shákirtteri, Eýraziia ulttyq ýniversitetiniń ustazdary men stýdentteri qatysty.
