Foto: QR Mádeniet jáne aqparat ministrligi
Uly aqyn-aǵartýshy, kompozitor, filosof Abai Qunanbaevtyń 180 jyldyq mereitoiyna orai «Astana Opera» teatrynda «Uiyqtap jatqan júrekti án oiatar» atty kontsert ótti, dep habarlaidy Ult.kz.
Bul keshte kompozitor Erkeǵali Rahmadievtiń Abai Qunanbaev óleńderine jazylǵan romans toptamasy alǵash ret oryndaldy. Atap aitsaq, «Qalyń elim, qazaǵym, qairan jurtym», «Jazdygún shilde bolǵanda», «Kóńilim qaitty dostan da, dushpannan da…», «Qajymas dos halyqta joq», «Siz – qyrǵaýyl jez qanat», «Qara qatyn», «Kóńil qusy quiqyljyr shartarapqa…» óleńderi bar.
Sonymen qatar, baǵdarlamada «Men sálem jazamyn», «Ǵashyqtyń tili – tilsiz til», «Keide eser kóńil qurǵyryń», «Ǵashyqtyq, qumarlyqpen – ol eki jol» atty tórt romans, Ahmet Jubanov pen Latif Hamididiń «Abai» operasynan ariialar, sondai-aq Sydyq Muhamedjanov, Mansur Saǵatov jáne Evgenii Brýsilovskiidiń aqyn sózine jazǵan ánderi oryndaldy.
Aita keteiik, «Uiyqtap jatqan júrekti án oiatar» kontserti teatrda Abai Qunanbaevtyń 180 jyldyq mereitoiyna arnalǵan is-sharalardyń bastaýy boldy. Kúzde aqynnyń sózine án jazǵan basqa da kompozitorlardyń shyǵarmalary shyrqalatyn kontsert ótedi.
Eske sala keteiik, «Astana Opera» repertýarynda Abaidyń ómiri men shyǵarmashylyǵyn beineleitin týyndylar bar. Máselen, 2015 jyly teatrdyń Úlken zalynda Muhtar Áýezovtiń librettosyna negizdelgen Ahmet Jubanov pen Latif Hamididiń «Abai» operasynyń premerasy ótti. Osy qoiylym úshin teatr 2018 jyly Qazaqstan Respýblikasynyń Memlekettik syilyǵyna ie boldy.
