Astanada politsiia alaiaqtyq shemaǵa qatysy bar 20 jastaǵy jigitti ustady, dep habarlaidy ult.kz.
Polisia.kz málimeti boiynsha, kúdikti alaiaqtyq tobynyń arnaiy kýreri bolǵan. Bir epizodta jábirlenýshilerden shamamen 7 mln teńge urlanǵan.
Alaiaqtar shetelden qońyraý shalyp, ózderin túrli memlekettik organdar men qyzmetterdiń ókilderi retinde tanystyrǵan. Keiin azamattardan túrli syltaýmen rastaý kodtaryn alǵan.
Odan soń jábirlenýshilerge politsiia nemese eGov qyzmetkerleri retinde qaita habarlasyp, beineqońyraý arqyly ózderin qyzmetker retinde kórsetken. Alaiaqtar azamattardy olardyń esepshottaryna shabýyl jasalyp jatqanyna jáne ózderi «dropper» bolyp qalýy múmkin ekenine sendirgen.
Osydan keiin jábirlenýshilerge aqshany bankten qolma-qol sheship alyp, «qaýipsiz jerde saqtaý» úshin arnaiy kýrerge tapsyrý usynylǵan.
Politsiia málimetinshe, 20 jastaǵy kúdikti alynǵan qarajatty kriptovaliýtaǵa aiyrbastap otyrǵan. Jedel-izdestirý is-sharalary barysynda onyń jeke basy anyqtalyp, turǵylyqty jerinde ustaldy.
Sondai-aq osyǵan uqsas taǵy bir alaiaqtyq deregi tirkelgen.
Qazir atalǵan faktiler boiynsha sotqa deiingi tergeý júrgizilip jatyr.
Politsiia azamattarǵa quqyq qorǵaý organdary men bank qyzmetkerleri eshqashan aqshany kýrerge berýdi nemese «qaýipsiz shotqa» aýdarýdy talap etpeitinin eskertedi.
Mundai qońyraý túsken jaǵdaida áńgimeni birden toqtatyp, tiisti uiymǵa onyń resmi bailanys nómiri arqyly ózińiz habarlasý qajet.
