Elorda ákiminiń orynbasary Baqtiiar Mákenniń tóraǵalyǵymen Nur-Sultanda koronavirýs infektsiiasynyń taralýyna jol bermeý jónindegi komissiianyń kezekti otyrysy ótti, dep habarlaidy QazAqparat.
Elordanyń bas memlekettik sanitarlyq dárigeri Sarhat Beisenova málim etkendei, Nur-Sultanda COVID-19 boiynsha epidemiologiialyq jaǵdai turaqsyz. Qala epidemiologiialyq ahýaldy baǵalaý matritsasynda bir aidan astam ýaqyt «qyzyl« aimaqta tur.
«Kúnine 350-den 650-ge deiin jaǵdai tirkeledi. Sońǵy aptada syrqattanýshylyq kórsetkishi aldyńǵy aptadan 9,7% joǵary, 100 myń turǵynǵa shaqqandaǵy qarqyndy kórsetkish 320,43 qurady. Reprodýktivti sany — 1,021. Jyl basynan beri qalamyzda naýqastar sany 22 myńnan asty, al pandemiia bastalǵannan beri 41 214 jaǵdai tirkeldi: 26 888 — simptomdyq jáne 14 326 — asimptomdyq. Ótken bir táýlikte 574 jańa jaǵdai tirkeldi (406 simptomdyq, 168 simptomsyz)», — dep túsindirdi elorda sanitarlyq dárigeri.
Jas qurylymy boiynsha: naýqastardyń eń joǵary kórsetkishi eresekter arasynda tirkeledi, olar KVI-men aýyrǵandardyń 79,9% quraidy, balalar 17,3%, jasóspirimder 2,8% quraidy. Sáýir aiynda naýryz aiymen salystyrǵanda egde jastaǵy adamdar arasynda koronavirýs juqtyrý jaǵdailarynyń 2,2% artty.
«14 jasqa deiingi balalar arasynda naýqastar sany úsh ese óskeni baiqalady. Qańtarda – 571, aqpanda – 479, naýryzda – 1106, sáýirde – 1790. Aitarlyǵy, infektsiia juqtyrý balalardyń barlyq jas toptarynda baiqalady. Bul rette sáýir aiynda jalpy syrqattanýshylyq kórsetkishi boiynsha balalar úlesi 0,8% azaidy. Bul, ásirese 7-10 jas aralyǵyndaǵy (5,1%-dan 4,3%-ǵa deiin tómendedi), 11-14 jastaǵy (4,5%-dan 4,3%-ǵa deiin tómendedi) mektep oqýshylaryna qatysty qabyldanǵan shekteý is-sharalarynyń tiimdiligin kórsetedi», — dep atap ótti Sarhat Beisenova.
