2020 jyldyń basynan beri Nur-Sultan qalalyq Politsiia departamentine qarjy piramidalarynan zardap shekken 150 adam shaǵym jasady, dep habarlaidy "Ult aqparat".
Atalǵan departamenttiń málimetinshe, barlyq jaǵdaida zardap shegýshiler qysqa ýaqytta qomaqty paida tabýǵa úmittengen. Bul rette olar uiym týraly aqparatty naqtylap alýdy qaperge almaǵan.
«Qarjy piramidalaryn uiymdastyrýshylar jii shet memleket azamattary bolyp shyǵady. Túrli shemalardy uiymdastyrý jáne damytý áleýmettik jeli arqyly júzege asyrylady. Ádette olar «Forex» «Advacash», «Teletrade» syndy tanymal kompaniialardyń nyshanyn paidalanady. Alaida, tergeý atalǵan kompaniialarmen olardyń ortaq bailanysy joq ekendigin, al olardyń izi jáne qazaqstandyqtardyń salymdary shet elderge ketetindigin kórsetip otyr», - delingen vedomstvo málimetinde.
Máselen, Nur-Sultan qalasy áleýmettik jeliden joǵary tabys tabýǵa bolatyndyǵy týraly habarlamany kórip, belgisiz tulǵanyń banktik kartasyna shamamen 100 myń teńge aýdaryp jibergen. Qysqa ýaqyttyń ishinde birneshe ese tabys kútken boijetkenge aqyr aiaǵynda politsiiaǵa júginýge týra kelgen.
Osyǵan orai Nur-Sultan qalalyq Politsiia departamenti «alaiaqtyq jobalardyń« negizgi belgilerin jariialap otyr:
Birinshiden, joǵary tabys tabýǵa ýáde beretin mundai jarnamalar buqaralyq aqparat quraldar men áleýmettik jelilerde jariialanady.
Ekinshiden, biznes jelilik marketing ustanymy negizinde uiymdastyrylady. Iaǵni, qatysýshynyń tabysy jańa qatysýshylardyń salymy esebinen qalyptastyrylady.
Úshinshiden, óz qyzmetterin sheteldegi jyljymaityn múlik, altyn óndirý, birjalyq mámileler, «Forex» naryǵy syndy salalarda júzege asyratyndyqtaryn málimdeidi.
Tórtinshiden, qarajat tartý qyzmetin júzege asyrýǵa arnalǵan litsenziialary bolmaidy.
