«Astana sý arnasy» MKK tehnikalyq damý bóliminiń basshysy Erjan Sharipov elordanyń sol jaǵalaýynda birneshe kósheniń sýsyz qalý sebebin aitty, dep habarlaidy "Ult aqparat".
«Elordadaǵy apatty jaǵdaidy basty sebebi – klimattyq jaǵdai. Aýa temparatýrasy ózgergende topyraq qozǵala bastaidy. Sonyń nátijesinde diametri - 90 0 sý qubyrynyń dánekerlengen jeri sógilgen. Apatty jaǵdai týraly habarlama tańǵy saǵat 05:20 minýtta jetti. Saǵat 06:00-de apatty jaǵdaidy oqshaýlaý úshin brigada oqiǵa ornynda boldy. Shamamen saǵat 10:30-da sý qubyry jabyldy. Sonyń nátijesinde 33-ten astam turǵyn úide sý toqtatyldy», - deidi Erjan Sharipov.
Jóndeý jáne qurylys brigadasy kameradaǵy apattyq jaǵdaidy oqshaýlaýǵa kirisip ketken.
«Saǵat 12:00-de sý jetkizý jumystary uiymdastyrylyp, 3 tehnika 13-14 reis jasap, sý ákeldi. Sóitip sýy toqtatylǵan úi turǵyndaryna shamamen 55 myń litr sý jetkizildi. Bul jaǵdai demalys kúni bolǵandyqtan, turǵyndardyń kóbi úilerinde edi, sol sebepti sý alýǵa kezek kóp boldy. 14:00-ge qarai apattyq jaǵdai bitkenmen, kamerada taǵy bir qubyrdy qaitalap dánekerleý qajet boldy. Saǵat 22:00-de negizgi sý jelisin iske qosyp, eki turǵyn úi kesheninen basqasyna sý berildi. Eki saǵattan keiin ol úilerge de sý bardy. Túngi saǵat 24:00-de úige aýyz sý berý tolyq qalypqa keltirildi», - deidi ol.
Atalǵan sý qubyry 2017 jyldyń qarasha aiynda iske qosylǵan. 2019 jyldyń qyrkúiek aiynda «Astana sý arnasy» MKK balansyna berilgen, biraq «KazGerStroi» JShS merdiger uiymynyń kepildendirilgen mindetteri bar.
«Atalǵan sý qubyry ýchaskesine tapsyrys berýshi – Nur-Sultan qalasy kólik jáne jol-kólik infraqurylymyn damytý basqarmasy. Kóptegen turǵyn úi sýsyz qalǵandyqtan, kim kináli ekenin anyqtap jatpai, birden jóndeý jumystaryna kiristik. Tiisti qujattar daiyn bolǵan soń osy merdigerlerge shaǵymdanatyn bolamyz», - deidi bólim basshysy.
Erjan Sharipovtiń aitýynsha, kepildigi bar qubyrlar únemi tekserilip, qai jerinde aqaý bar ekeni jazylyp alynady. Munyń bári saraptalyp, qorytyndysy shyǵady.
Eske sala ketsek, buǵan deiin «Astana Sý arnasy» keibir turǵyn úilerde sýdyń toqtap qalý sebebin túsindirdi. Sondai-aq, elordada sý júiesin qalpyna keltirý úshin 2 brigada jumys istep, sýsyz qalǵan úilerine aýyz sý jetkizildi.
17 qarashada Nur-Sultandaǵy «Jaǵalaý» shaǵyn aýdanynyń turǵyn úilerine sý berile bastady.
