Foto ©️ Tengrinews.kz / Turar Qazanǵapov
Astananyń qylmystyq ister jónindegi mamandandyrylǵan aýdanaralyq sotynda LRT isine qatysy bar 9 adam sottaldy, dep habarlaidy Sputnik Qazaqstan.
Talǵat Ardan men Qanat Sultanbekovke syrttai úkim shyǵarylyp, 7 jylǵa bas bostandyǵynan aiyryldy.
Aiyptaý aktisine sáikes, 2009 jyldyń 2 qazany men 2014 jyldyń 19 jeltoqsany aralyǵynda Astana qalasy ákiminiń orynbasary qyzmetin atqarǵan Q.Sultanbekov pen 2011 jyldyń 18 mamyry men 2017 jyldyń 26 shildesi aralyǵynda "Astana LRT" JShS basqarma tóraǵasy bolǵan T.Ardan qyzmet babyn paidalana otyryp, LRT, BRT, ITS jobalaryna, tehnikalyq qadaǵalaý jáne ASTRA jobasyna bólingen asa iri kólemdegi biýdjet qarajatyn talan-tarajǵa salǵan (Qylmystyq kodekstiń 189-baby 4-bóliginiń 2-tarmaǵy).
D.Ábdihamitov, Ý.Achilov ta qylmysqa barǵan. Ábdihamitov qarajatty jymqyrý úshin birneshe JShS-ny tartyp, osy firmalardyń múddesin qorǵaǵan, jobaǵa túsken qarajatty qolma-qol aqshaǵa ainaldyrýdy baqylaǵan. Achilov JShS direktory qyzmetin atqara otyryp, atqarylǵan jumystyń aqysy asyryp kórsetilgen aktilerge qol qoiǵan.
Sot sondai-aq aqshany jymqyrýǵa kómektesken R.Amanjolovty, J.Nurpeiisovti jáne T.Áshimdi kináli dep tapty.
Amanjolov pen Nurpeiisov Astana qalasy ákimdiginiń basqarma basshysy bola otyryp, qyzmetterdi memlekettik satyp alý týraly qujattarǵa, ekonomikalyq qorytyndylarǵa qol qoiyp, sol arqyly áleýetti qyzmet kórsetýshiler sheńberin shektep otyrǵan. Olar joǵarylatylǵan baǵamen qorytyndylarǵa qol qoiǵan. "Astana Innovation" AQ basqarma tóraǵasy bolǵan Áshim ekonomikalyq saraptama men tehnikalyq-ekonomikalyq negizdemeni joǵarylatylǵan baǵamen bekitken.
JShS direktory bolǵn T.Qasabaev, D.B. Músenov LRT jáne BRT jobalaryn ázirleýge joǵary baǵamen qosalqy merdigerlik sharttar jasasyp, qarajatty qolma-qol aqshaǵa ainaldyrýmen ainalysqan.
"Sottalýshylardyń qylmystyq áreketteriniń saldarynan memleketke 5,8 mlrd teńge kóleminde shyǵyn keltirildi", - delingen sot habarlamasynda.
Amanjolov, Nurpeiisov, Áshim, Achilov, Ábdihamitov, Qasabaev jáne Músenov 7 jylǵa bas bostandyǵynan aiyryldy.
Áshim, Qasabaev jáne Músenovke Qylmystyq kodekstiń 63-baby qoldanylyp, shartty túrde sottaldy.
Is boiynsha prokýrordyń talap aryzy da qanaǵattandyrylyp, 7 kelisimshart boiynsha keltirilgen 5 milliard teńgeden astam shyǵyn memleket paidasyna óndirildi. Úkim zańdy kúshine engen joq.
