Elordadaǵy Táýelsizdik saraiyna Shanhai yntymaqtastyq uiymyna múshe memleketterdiń basshylary uiym keńesiniń shaǵyn quramdaǵy otyrysy QR Prezidenti Nursultan Nazarbaevtyń tóraǵalyǵymen ótip jatyr, dep habarlaidy QazAqparat.
«Osynda otyrǵan barlyqtaryńyzdyń atynan Prezident bolyp sailanǵannan keiin bizdiń Memleket basshylary keńesimizge alǵash ret qatysyp otyrǵan Shavkat Mirzieevke airyqsha hosh keldińiz demekpin jáne oǵan qyzmetinde jáne birlesken jumysymyzda zor tabystar tileimin. Aǵymdaǵy jyly ShYU-ǵa 16 jyl tolady. Osyndai sátte tarih eske túsedi. 5 memleket Qytai Halyq Respýblikasymen shekara problemalaryn sheship, qujatqa qol qoiǵannan keiin sol kezdegi Qytaidyń Tóraǵasy Tszian Tszemin myrza ekeýimiz «shekaraǵa qol qoiylǵannan keiin jyraqtap ketpei, ekonomikalyq yntymaqtastyq uiymdastyraiyq» dep usynǵan edik. Osylaisha ShYU dúniege keldi jáne sol tarihi aktige qol qoiý rásimine qatysqan Rahmon myrza ekeýimiz barlyǵyna kýá bolyp kelemiz», - dedi otyrysty ashqan Memleket basshysy.
QR Prezidenti uiym sol ýaqyttan bastap halyqaralyq tanymaldyqqa ie bolyp, kópbeiindi ózara is-qimyldyń tiimdi alańyna ainalǵanyn, óńirdegi qaýipsizdik nyǵaitý, ekonomikalyq yntymaqtastyqty tereńdetý, múshe elder arasyndaǵy mádeni-gýmanitarlyq yntymaqtastyqty keńeitý boiynsha úlken jumystar atqarylǵanyn atap ótti. Salmaqty sharttyq-quqyqtyq baza qalyptastyrylyp, myǵym institýtsionaldyq negiz qurylǵan, óńirlik jáne jahandyq mártesi kúsheie túskendigin aitty.
«Astana sammitinde bizdiń uiymymyzdyń jańa tarihy bastalady dep aitsaq ta bolady. Bul jolǵy otyrys buǵan deiingidei altyjaqty formatta sońǵy ret ótkeli otyr. Búgin biz Úndistan men Pákistan Islam Respýblikasyn ShYU-ǵa qabyldaý protsesin aiaqtap, múshe memleket mártebesin berý týraly sheshimge qol qoiýǵa ýaǵdalastyq. Jańa músheni qabyldaý uiymnyń damýyna jań tyń serpin berip, onyń halyqaralyq bedeliniń ósýine óz septigin tigizedi», - dedi Nursultan Nazarbaev.
Shaǵyn quramdaǵy otyrysqa QHR Tóraǵasy Si Tszinpin, Ózbekstan Prezidenti Shavkat Mirzieev, Qyrǵyzstan Prezidenti Almazbek Atambaev, Resei Prezidenti Vladimir Pýtin, Tájikstan Prezidenti Emomali Rahmon qatysýda.
