Keshe, 23 shilde kúni Astanada nebári 10–15 minýtqa sozylǵan nóser jaýynnan keiin qaladaǵy birneshe kósheni sý basty, dep habarlaidy ult.kz.
Áleýmettik jelilerde taraǵan beinejazbalardan joldardyń ózenge ainalyp, keibir jeńil kólikterdiń sý ortasynda qalyp qoiǵanyn kórýge bolady.
Nóserden keiin qalada burshaq jaýyp, naizaǵai oinady. Aýa raiynyń kúrt qubylýy turǵyndardy ábigerge saldy.
Osy jaǵdaiǵa qatysty City Transportation Systems (CTS) kompaniiasy túsinikteme berip, oqiǵanyń tótenshe jaǵdai emes ekenin málimdedi. Kompaniianyń habarlaýynsha, sý aǵýy injenerlik júielerdi iske qosý jáne retteý jumystary kezinde oryn alǵan.
Qazirgi ýaqytta anyqtalǵan aqaýlardy joiý jáne nysannyń tolyq germetikalyǵyn qamtamasyz etý jumystary júrgizilip jatyr. CTS málimetinshe, Tarlan Astana stantsiiasy shtattyq rejimde jumysyn jalǵastyryp jatyr.
Aita keteiik, bul Astanadaǵy alǵashqy jaǵdai emes. 2025 jyly da nóser jańbyrdan keiin qalanyń birneshe kóshesin sý basyp, kólik qozǵalysy qiyndaǵan bolatyn. Ol kezde de áleýmettik jelilerde kóshelerdiń ózenge ainalǵany, kólikterdiń sýda qalǵany týraly videolar keń taraǵan edi. Mamandar mundai jaǵdaidy qysqa ýaqyt ishinde jaýyn-shashyn mólsheriniń normadan birneshe ese artýymen jáne jańbyr sýyn aǵyzý júiesine túsetin júktemeniń kóbeiýimen bailanystyrǵan.
