- Astana protsesine 15-ke jýyq siriialyq oppozitsiia qatysady. Bul týraly búgin «Qazmedia» ortalyǵynda ótken baspasóz máslihatynda QR Syrtqy ister ministriniń orynbasary Roman Vasilenko málim etti, dep habarlaidy QazAqparat.
«Delegatsiia basshylaryna qatysty aitar bolsam, Siriianyń úkimettik delegatsiiasyn BUU janyndaǵy osy eldiń turaqty ókili Basar al-Djafari basqarady. Siriialyq oppozitsiia delegatsiiasynda shamamen 15 oppozitsiialyq toptyń ókili bar. Astana kelissózderiniń kepilger elderi de joǵary deńgeide kelip otyr. Resei delegatsiiasyna RF Prezidentiniń siriialyq retteý máseleleri jónindegi arnaýly ókili Aleksandr Lavrentev basshylyq jasaidy. Túrik jáne iran delegatsiialarynyń basshylary atalǵan memleketterdiń Syrtqy ister ministrleriniń orynbasarlary - Sedat Onal men Sadek Hýsein Djaberi Ansari», - dedi Vasilenko.
SIM orynbasarynyń aitýynsha, siriialyq daǵdarysty retteý protsesi úshin Astana kelissózderiniń mańyzdy ekendigin BUU bas hatshysynyń Siriia jónindegi arnaýly ókili Staffan de Mistýranyń qatysýy da bildiredi. Al AQSh delegatsiiasyn osy eldiń Qazaqstandaǵy Elshisi Djord Krol basqarady.
«AQSh atynan nelikten Elshi qatysýda? Menińshe, bul faktiden qandai da bir teris jait qarastyrýdyń qajeti joq. Qańtar aiynyń basynda endigi ýaqytty AQSh-tyń burynǵy memlekettik hatshysyna ainalǵan Djon Kerri AQSh-tyń Astana kelissózderin qoldaityndyǵyn málimdegen bolatyn. Buǵan qosa, Resei, Túrkiia jáne Iranǵa qaraǵanda AQSh bul kelissózderdiń bastamashysy bolyp sanalmaityndyǵyn da eskerý qajet. Sondyqtan da osy faktige orai amerikalyq delegatsiia deńgeii qalyptasyp otyr. Degenmen, Elshi Krol syndy tájiribeli diplomattyń biliktiligine eshkim de kúmán keltire almas dep oilaimyn», - dedi ol.
