Astana formatyndaǵy kelissózder Siriiada uzaqqa sozylǵan soǵystyń aiaqtalýyn jaqyndata tústi. Bul týraly búgin elordada aiaqtalǵan Siriia boiynsha Astana protsesiniń 11 raýndyn qorytyndylaǵan QR Syrtqy ister ministri Qairat Ábdirahmanov aitty, dep habarlaidy QazAqparat tilshisi.
«Qonaqjai qazaq eliniń bas ordasynda QR Prezidenti Nursultan Nazarbaevtyń úzdiksiz qoldaýymen júzege asyrylyp kele jatqan Siriia boiynsha Astana protsesiniń kezekti raýndy aiaqtalýda. Buǵan deiin ótken 10 raýndtardai, osy basqosý aiasynda siriiaaralyq kelissózder úderisine qosymsha serpilis ákeletin, qarsylasýshy taraptar arasyndaǵy senimdi arttyratyn, sondai-aq qarapaiym siriialyqtardyń ómirine oń áser tigizetin mańyzdy nátijelerge ie bolý - ol qýantarlyq jait», - dedi ministr.
Qairat Ábdirahmanovtyń atap ótýinshe, Astana protsesiniń kepilger elderiniń birlesken kúsh-jigeri men jaýapty kózqarasy Siriia shielenisin retteý jolyndaǵy mańyzdy kelisimderdi júzege asyrýda kórinis tabatyndyǵy sózsiz. Onyń aiqyn dálelderdiń biri - ol kóptegen beibit siriialyq azamattardyń qurban bolýyna jáne eldegi gýmanitarlyq jaǵdaidyń odan ári ýshyǵýyna jol bermegen Idlip jónindegi ýaǵdalastyqtar.
«Sonymen qatar, tutqyndardy bosatý, qaza tapqandardyń denelerin tabystaý jáne iz-tússiz joǵalǵandardy izdestirý tobynyń jumysy aiasynda jaqynda Aleppo provintsiiasynda oryn alǵan tutqyndar men májbúrlep ustalǵan adamdarmen almasý is-sharasyn da atap ótken jón dep sanaimyn. Joǵaryda baiandalǵandy eskere otyryp, búgingi kúni Astana formatyndaǵy kelissózder Siriiada uzaqqa sozylǵan soǵystyń aiaqtalýyn jaqyndata túsetin biregei tetik bolyp tabylatynyn aitýǵa tolyq negiz bar dep oilaimyn», - dedi QR Syrtqy ister ministri.
