Astanada №1 perinataldyq ortalyqta bosanǵan eki áieldiń qaitys bolýy oqiǵasynyń mán-jaiy jariia etildi, dep habarlaidy QazAqparat.
Astana qalasy qoǵamdyq densaýlyq saqtaý basshysy orynbasarynyń mindetin atqarýshy Sáýle Muqyshevanyń sózine qaraǵanda, eki jyl boiy №1 perinataldyq ortalyqta ana ólimi tirkelmegen. Sonymen qatar, osy ortalyqtyń mamandary joǵary biliktilikti dárigerler.
«Jedel em-dom sharalaryn kórsetý kezinde Astana aýmaǵyndaǵy respýblikalyq mekemelerdiń barlyq mamandary shaqyrtyldy. Olarǵa reanimatsiianyń eń jańa ádisteri qoldanyldy. Keshe Astana qalasy ákiminiń orynbasary Ermek Amanshaevtyń, basqarma basshysynyń qatysýymen kezekten tys shtab ótkizildi. Qazirgi kezde qyzmettik tekserý júrip jatyr. Astana qalasy qoǵamdyq densaýlyq saqtaý basqarmasymen komissiia quryldy», - dedi Sáýle Muqysheva.
Onyń sózine qaraǵanda, basqarmada aldyn ala qyzmettik tekserý men respýblikalyq komissiianyń tekserýi sharalaryn kútip otyr. Olar eki oqiǵa boiynsha barlyq málimetterdi tyńǵylyqty qarap shyǵady.
«Respýblikalyq komissiia nátijesi boiynsha qoǵamdyq densaýlyq saqtaý basqarmasy uiymdastyrýshylyq ári basqarýshylyq sharalardy qabyldaidy. Gestologiialyq zertteýler daiyn emes. Olar tek 10 kúnnen keiin ázir bolady», - dep túsindirdi ol.
Sonymen qatar, basqarma basshylyǵynyń málimetinshe, dúniege kelgen balalardyń qazirgi jaǵdaiy aýyr bolsa da, turaqty. «Olar jansaqtaý bóliminde bilikti mamandardyń baqylaýynda jatyr», - dep naqtylady ol.
Dáregerlerdiń aitýynsha, 34 jastaǵy bosanǵan birinshi áiel 21 maýsymda tańǵy saǵat 5-te, al ekinshisi (31 jasta) 25 maýsymda saǵat 4 kezinde kóz jumdy.
«Birinshi jaǵdaida kelinshek balany ózi bosandy, al ekinshi jaǵdaida kesar tiligi jasaldy. Ekeýi de osyǵan deiin bosanǵan áielder. Sonymen qatar olardyń júktilikke bailanysty emes aýrýlary bolǵan», - dedi Sáýle Muqysheva.
Budan buryn habarlanǵandai, Astanada №1 perinataldyq ortalyqta bosanǵan eki áiel qaitys boldy.
