Foto: Aqorda
Qazaqstan Respýblikasynyń Prezidenti Qasym-Jomart Toqaev qazaqstandyqtardy Astana kúnimen quttyqtady.
Qurmetti otandastar!
Astana kúni qutty bolsyn!
Biyl bul mereke Dombyra kúnimen tuspa-tus kelip otyr. Munyń simvoldyq máni zor. Qazaqtyń qasietti qara dombyrasy Uly dalanyń myńjyldyq biregei mádeni murasyn áigileidi. Al elordamyz Qazaqstannyń turaqty ári qarqyndy ósip-órkendeýin jáne jasampaz ulttyń jarqyn bolashaqqa umtylysyn aishyqtai túsedi.
Búginde Astana — elimizdiń qoǵamdyq, saiasi jáne iskerlik ordasy. Dál osy jerde halqymyzdyń bolashaǵyna qatysty mańyzdy sheshimder qabyldanady, ozyq ideialar iske asyrylyp, biik maqsattar oryndalady. Munda bilimpazdyq pen eńbekqorlyq qundylyqtary berik ornyǵyp, jurtymyzdyń yntymaǵy men kelisimi nyǵaia beredi.
Astana Ortalyq Eýraziianyń jaýhary, zamanaýi Qazaqstannyń kelbeti sanalady. Halyqaralyq qaýymdastyq bas qalamyzdy bitimgershilik bastamalardy júzege asyryp, jahandyq dialog ornatý isinde erekshe ról atqaratyn beibitshilik shahary retinde biledi.
Elordamyz árdaiym túbegeili ózgerister men aýqymdy reformalardyń bastaýynda turady. Aldaǵy ýaqytta da Astanamyz Ádiletti, Taza jáne Qýatty Qazaqstandy qurý jolyndaǵy jalpyulttyq jańǵyrý jumystaryna uiytqy bola beredi dep senemin.
Súiikti qalamyz órkendep, gúldene bersin!
Barshańyzǵa zor densaýlyq, baq-bereke tileimin!
