«Astana Operada» kórermen nazaryna Ulystyń Uly kúnine arnalǵan «Qosh keldiń, Naýryz!» mýzykalyq keshi usynylmaq. Opera solisteri, hor jáne orkestr ártisteriniń qatysýymen jarqyn kontsert 21 naýryz kúni Kameralyq zal sahnasynda ótedi.
Merekelik keshke vokalister – «Astana Opera» solisteri Saltanat Muratbekova, Ásem Sembina, Shyńǵys Rasylhan; Qazaqstannyń eńbek sińirgen ártisi Ǵaliia Baiǵazinova, Erjan Saipov, Aqylbek Tabynbaev, Rýslan Sovet, Maǵjan Amanjolov, Ulpan Áýbákirova, Gúlsara Jazitova, Azat Málik, Almat Izbambetov qatysady. Sondai-aq Kameralyq zal sahnasyna aspapshy mýzykanttar – «Dolce» skripkashylar ansambli, Raýshan Beskempirova, Ábdiahmet Orazbaqov (fortepiano), Aqmaral Baiqýatova (qobyz) shyǵady.
- Osynaý kóne meiram barsha túrki halyqtar úshin kóktemniń jarshysy, tabiǵattyń jańaryp, gúldený shaǵy, mahabbat pen dostyqtyń nyshany bolyp tabylady. Teatr ujymy atynan qymbatty tyńdarmandarymyzǵa ystyq lebizimizdi bildirip, Naýryz merekesi árbir shańyraqqa molshylyq, qut-bereke, sáttilik ala kelsin dep tileimiz. Júrekterińiz qýanyshqa tolsyn, al janyńyzda árdaiym jaqsy áýen shyrqalsyn, - dep atap ótti oryndaýshylar.
Baǵdarlamaǵa kópshilik súiip tyńdaityn qazaq halyq ánderi, otandyq kompozitorlardyń vokaldyq jáne aspaptyq týyndylary, ulttyq operalyq klassikadan ariialar men sahnalyq kórinister engen.
Budan bólek, 22 jáne 23 naýryz mereke kúnderi elorda turǵyndary men qonaqtaryna ulttyq klassikamyzdyń jaýhar týyndysy – E.Brýsilovskiidiń «Qyz Jibek» operasy usynylady, al 24 naýryzda Ulystyń Uly kúnine arnalǵan «Janymdy terbetken áýen» atty hor mýzykasyna arnalǵan kontsert ótedi. Dirijer Gúlmira Quttybadamovanyń jetekshiligimen Astana qalasy ákimdiginiń Memlekettik akademiialyq filarmoniiasy Kameralyq horynyń oryndaýynda hor mýzykasynyń ozyq týyndylary shyrqalady. 28 naýryzda eń jas kórermenderge teatrdyń shyǵarmashylyq ujymy Tileýǵazy Beisembektiń «Samuryq kelgen tań» mýzykalyq ertegisin usynady, 27 naýryzda múmkindigi shekteýli balalar úshin osy spektakldiń qaiyrymdylyq kórsetilimi ótedi.
Kontserttiń bastalýy saǵat 18.00-de.
