Almaty qalasy ákimdiginiń shaqyrýymen jeltoqsannyń 21-22 kúnderi Abai atyndaǵy Qazaq ulttyq akademiialyq opera jáne balet teatrynyń sahnasynda Táýelsizdiktiń 30 jyldyǵyna orai merekelik baǵdarlama usynylady, dep habarlaidy QazAqparat «Astana Opera» teatrynyń baspasóz qyzmetine silteme jasap.
«Astana Opera» balet trýppasynyń ónerin tamashalaý – almatylyqtar úshin árdaiym aitýly oqiǵa. Pandemiianyń saldarynan mundai kezdesýler sirep ketti, degenmen onyń ózi kóńildi bir marqaityp tastaityn. Elordalyq ártisterdiń ótken jolǵy gastroldik sapary kezinde kópshiliktiń kóńili qatty tolqydy. Ókinishke qarai, biraz adamdar kele almai, qapy qalǵany da belgili. Endi almatylyq kórermenderdiń balet óneriniń tunyǵynan sýsyndap, keremet áser alýǵa múmkindikteri bar.
Ekikúndik gastroldik baǵdarlama aiasynda «Astana Opera» jetekshi solisteriniń, atap aitsaq, Qazaqstannyń eńbek sińirgen qairatkerleri Baqtiiar Adamjan, Áigerim Beketaeva, Ánel Rústemova, Mádina Basbaeva, Gaýhar Ýsina, Erkin Rahmatýllaev, sondai-aq Oljas Tarlanov pen Arman Ýrazov, solister – Shuǵyla Ádephan, Serik Naqyspekov, Anastasiia Zaklinskaia, Daler Zaparov, Móldir Shákimovanyń oryndaýynda N.Rimskii-Korsakovtyń mýzykasyna «Sheherazada» bir bólimdi horeografiialyq dramasy jáne Gala-balet kórsetiledi.
«Astana Opera» balet trýppasynyń kórkemdik jetekshisi, Reseidiń Halyq ártisi Altynai Asylmuratovanyń negizgi oiy – ónerde óz ornyn oiyp turyp alǵan bishilermen birge solardyń ókshesin basyp kele jatqan jas oryndaýshylardyń óner kórsetýi. Sol sebepti baǵdarlamada kópshilik kórermen Baqytgúl Ispanova, Daniiar Jumataev, Diias Qurmanǵazy, Adelina Tólepova, Jánibek Ahmediev, Jaqsylyq Saýqymbekovti kóre alady.
Bul joly ártister Gala-balettiń klassikalyq jáne zamanaýi qoiylymdarynan túrli kórsetilimder engizilgen eki nusqasyn daiyndady. Kórermenderdiń nazaryna M.Petipanyń horeografiiasyndaǵy A.Glazýnovtyń «Raimonda» baletinen Gran-pa, R.Petidiń horeografiiasyndaǵy L.Delibtiń «Koppeliia» baletinen Frantstyń variatsiiasy, S.Legat pen N.Legattyń qoiylymyndaǵy I.Baierdiń «Qýyrshaqtar perisinen» trio, sondai-aq P.Chaikovskiidiń «Aqqý kóli» jáne R.Drigonyń «Talisman» (M.Petipanyń horeografiiasy) baletterinen Pa-de-de usynylady. Sonymen qatar ártister R.Rebektiń horeografiiasynda «Bethoven – Máńgilik – Mahabbat», P.Bananyń qoiylymyndaǵy Q.Shildebaevtyń mýzykasyna «Dala úni» jáne F.Shopenniń «Eles bal» (D.Briantsevtyń horeografiiasy) baletterinen dýetter oryndaidy.
Jeltoqsan aiynyń basynda ártister gastroldik saparmen «Astana Balet» sahnasynda óner kórsetken edi. Áigerim Beketaeva Zobeidanyń rólin alǵash ret somdap, juldyzy jarqyrai tústi. Jáne de «Qýyrshaqtar perisi» baletinen úzindi bilegen Baqytgúl Ispanova men Daniiar Jumataev úshin de debiýt oryn aldy. «Eles bal» baletinen dýette Jaqsylyq Saýqymbekov te alǵash óner kórsetti, al Anastasiia Zaklinskaia «Bethoven – Máńgilik – Mahabbat» baletinen dýette alǵash ret sahna tórine shyqty. Jalpy, gastroldik baǵdarlamada teatrdyń barlyq solisteri ózderiniń sheberlikterin kórsete aldy.
Almatyda ótetin ekikúndik sapar kezinde kórermender ekinshi bólimde kórsetiletin N.Rimskii-Korsakovtyń mýzykasyna «Sheherazada» bir bólimdi horeografiialyq dramasyn tamashalai alady. «Myń bir tún» ertegisinen shabyt alǵan klassikalyq romantikalyq balettiń negizin qalaýshy Mihail Fokin spektakldi sonaý 1910 jyly qoiǵan bolatyn.
Osylaisha, ol teatr álemin tańdai qaqtyrdy. Spektakl «Orys mezgilderi» festivali aiasynda Parijde «Grand Opera» sahnasynda qoiyldy. Bir ǵasyr ótkennen keiin Reseidiń halyq ártisi Andris Liepa «Astana Opera» teatrynda qoiylymdy qaita jańǵyrtyp sahnalady.
N.Rimskii-Korsakovtyń eliktirer mýzykasy, sonymen qatar Lev Baksttyń syzbalary negizinde qoiýshy sýretshi Anatolii Nejnyi jáne kostiýmder boiynsha sýretshi Elena Netsvetaeva-Dolgalevanyń qolymen qaita jasalǵan tarihi dekoratsiialar men kostiýmder kórermendi shyǵys ertegisindegi ǵajaiyp álemge jetelep, «Astana Opera» ártisteriniń sheberligi men daryny esten ketpes áser syilaityny sózsiz.
