Memleket basshysy Qasym-Jomart Toqaev salalyq joǵary oqý oryndaryna belgili meditsina qairatkerleriniń esimin berý jónindegi bastamany qoldaitynyn málimdedi, dep habarlaidy ult.kz.
Aqordada ótken Meditsina qyzmetkeri kúnine arnalǵan saltanatty jiynda Prezident «Astana meditsina ýniversitetiniń» jetistikterine erekshe toqtaldy.
Memleket basshysynyń aitýynsha, oqý orny tsifrlyq densaýlyq saqtaý men biomeditsina salalaryn tabysty damytyp keledi jáne elimizdegi jetekshi meditsinalyq joǵary oqý oryndarynyń birine ainalǵan.
«Úkimet atalǵan oqý ornynyń aiqyn jetistikterin eskerip, ol eń joǵary – Ulttyq ýniversitet mártebesin alýǵa ábden laiyq dep sanaidy. Bul usynysty qoldaimyn», – dedi Qasym-Jomart Toqaev.
Prezident sondai-aq ýniversitetke kórnekti ǵalym, otandyq taǵamtaný ǵylymy men profilaktikalyq meditsinanyń negizin qalaýshylardyń biri, Qazaqstannyń Eńbek Eri Tóregeldi Sharmanovtyń esimin berý oryndy ekenin aitty.
Sonymen qatar Memleket basshysy Qaraǵandy meditsina ýniversitetine oqý ornynyń negizin qalaǵan ári ony uzaq jyldar basqarǵan Petr Pospelovtiń esimin berý týraly bastamany da qoldady.
Prezidenttiń pikirinshe, Qaraǵandy meditsina mektebiniń qalyptasýyna zor úles qosqan tulǵanyń 125 jyldyǵy qarsańynda mundai sheshim qabyldaý tarihi ádilettilikti qalpyna keltirýge múmkindik beredi.
Osylaisha, elimizdegi jetekshi meditsinalyq joǵary oqý oryndaryna belgili ǵalymdardyń esimin berý arqyly olardyń ǵylym men bilim salasyna sińirgen eńbegin ulyqtaý kózdelip otyr.
