Astana LRT isine qatysty kúdikti Talǵat Ardan men Qanat Sultanbekovtiń qaida júrgeni týraly aqparat bar. Bul týraly QR Sybailas jemqorlyqqa qarsy is-qimyl agenttigi 2-departamentiniń basshysy Sergei Perov aitty, dep habarlaidy QazAqparat.
«Bul is qazirgi ýaqytta sotta qaralyp jatyr. Sottalýshylar qatarynda 7 adam bar, protsess jan-jaqty habarlanyp otyr. Eki tulǵany, atap aitqanda Talǵat Ardan men Qanat Sultanbekovti izdeý jalǵasyp jatyr. Ony halyqaralyq yntymaqtastyq aiasynda júrgizýdemiz. Kúdiktilerdiń júrgen jeri týraly aldyn ala aqparat bar. Ol - alys shetel. Interpol elimizden tysqary jerde jasyrynyp júrgen kúdiktilerdi izdep jatyr», - dedi Sergei Perov agenttiktiń alqa otyrysy aiasynda BAQ ókilderine bergen suhbatynda.
Eske sala ketsek, ótken jyly Sybailas jemqorlyqqa qarsy is-qimyl agenttiginiń 1-shi departamentiniń asa mańyzdy ister jónindegi tergeýshisi Daniiar Bekaidarov «Astana LRT» kompaniiasy boiynsha is sotqa joldanǵanyn habarlaǵan edi.
Keiinirek osy is boiynsha alǵashqy sot otyrysy qashan ótetini belgili boldy.
Aita ketsek, Memleket basshysy Qasym-Jomart Toqaev LRT isi boiynsha jaýapty adamdar baqylaýshy organdardyń suraǵyna jaýap berýi kerektigin eskertken bolatyn.
Sondai-aq Prezident byltyr kúzde LRT qurylysyn jedeldetýdi jáne oǵan qatysty isti tergeýdi tapsyrǵan bolatyn.
Artynsha ótken jyldyń qańtar aiynda Sybailas jemqorlyqqa qarsy is-qimyl agentiginiń ekinshi departamentiniń basshysy Sergei Perov elordada LRT qurylysyn salý barysynda qarajat urlaý qylmystyq isin tergeý sharalary aiaqtalǵanyn málim etken edi.
Onyń aitýynsha, anyqtalǵan shyǵyn somasy 5,7 mlrd teńgeni qurap otyr. Atalǵan is boiynsha 10-nan astam adamnyń jaýapkershiligi tekserilip, úsh adamǵa izdeý jariialanǵan.
