Foto: nn-airport.kz
Aviatsiia – bul tehnologiianyń, dáldiktiń jáne adam eńbeginiń sinergiiasy. Árbir reis, árbir sátti oryndalǵan reis – kózden tasa bolsa da, myńdaǵan mamannyń úilesimdi jumysynsyz múmkin bolmaityn nátije. Astana halyqaralyq áýejaiy – elimizdiń áýe qozǵalysynyń júregi, munda qaýipsizdik, jailylyq jáne tiimdilik birinshi orynda.
Aviatsiia kúni qarsańynda biz áýe qatynasyn yńǵaily ári senimdi etetin jandar, sairap turǵan sandar jáne jańa kókjiekterdi jaqyn etetin áýejaidyń damýy jaily aitqymyz keledi.
2000 maman: táýlik boiy jumys isteitin komanda
Astana halyqaralyq áýejaiy – jolaýshylardyń áýedegi qaýipsizdigin qamtamasyz etýdi maqsat tutqan 2000-nan astam jumyskeri bar ujym. Aviatsiialyq qaýipsizdik qyzmeti táýlik boiy áýejaidaǵy jaǵdaidy qadaǵalap, árbir júkti muqiiat tekserip, áýe kemesine kirý múmkindigin qaýipsiz etedi, kinologtar yqtimal qaýipterdiń aldyn alady. Jer ústi qyzmetteri áýe kemelerin ushýǵa daiyndap, muzǵa qarsy óńdeýdi júrgizedi jáne áýe kemesiniń aýadaǵy turaqtylyǵyna áser etetin bagaj balansyn baqylaidy. Dispetcherler men ramp-agentter áýe kemeleriniń jerdegi naqty qozǵalysyn qamtamasyz etedi, al órt sóndirý qyzmeti tótenshe jaǵdai kezinde dereý áreket etý úshin árdaiym daiyn.
Áýejai jumyskerleriniń tynymsyz eńbeginiń arqasynda 2024 jyly 107 tyiym salynǵan zat jáne tasymaldaýǵa shekteý qoiylǵan 27 552 zat anyqtaldy. Kinologtar men qyzmettik itter qaýip-qaterdiń aldyn alatyn jáne ushý qaýipsizdigin qatań baqylaityn «kózge túspeitin» naǵyz saqshylar. Elorda áýejaiynyń erekshe qajettilikteri bar jolaýshylary árqashan nazarda. Biyl Astana áýejaiy múmkindigi shekteýli 31 019 jolaýshyǵa qyzmet kórsetip, olardyń jaily ári kedergisiz qozǵalysy úshin eńbek etti.
Aitarlyqtai ósim men masshtab
Astana halyqaralyq áýejaiynda jolaýshylar aǵyny turaqty artýda. 2024 jyly elorda áýejaiynda 8 315 108 jolaýshyǵa qyzmet kórsetildi, bul ótken jylmen salystyrǵanda 11%-ǵa artyq kórsetkish. Ishki áýe qatynasy 9 paiyzǵa, halyqaralyq - 16 paiyzǵa ósti.
- - Ishki áýe tasymaly – 5 668 234 jolaýshy (+9%).
- - Halyqaralyq áýe tasymaly – 2 646 874 jolaýshy (+16%).
Saiahattaý yńǵailyraq bolyp, baǵyttardyń sany keńeie tústi.
Áýejaida reister jiiligin arttyrý jáne ushý geografiiasyn keńeitý boiynsha belsendi jumys júrgizilýde. Ótken jyly Eýropaǵa, Taiaý Shyǵysqa, Ońtústik-Shyǵys Aziiaǵa jáne TMD elderine áýe reisteri qaita jandandy. Álemniń iri qalalaryna, sonyń ishinde Abý-Dabi, Seýl, Tbilisi, Praga, Sankt-Peterbýrgke, sondai-aq Kamran, Bodrým jáne Phýket siiaqty tanymal týristik baǵyttarǵa ushý jiiligi ulǵaityldy.
2024 jyly alǵash ret Dýshanbe, Fýkýok, Phýket jáne Milan qalalaryna reister ashyldy.
Bul ósim Qazaqstannyń tranzittik áleýetin damytýǵa, áýejaidyń halyqaralyq hab retindegi ustanymyn nyǵaitýǵa yqpal etedi.
Júk tasymaly: jańa rekordtar
Áýe logistikasy áýejai qyzmetiniń mańyzdy bóligine ainalyp kele jatyr. Jyl ishinde 12 470 824 keli júk pen poshta óńdeldi, bul ótken jylmen salystyrǵanda 39 paiyzǵa artyq. Bul rette halyqaralyq júk tasymaly 78%-ǵa ósti, bul jahandyq logistikada áýejai bedeliniń kóterilip kele jatqanyn kórsetedi.
Zamanaýi infraqurylym – jańa múmkindikter
Elorda áýejaiy ushý qaýipsizdigin barynsha qamtamasyz etýge taǵy bir qadam jasady. Astana áýejaiynda halyqaralyq standarttarǵa tolyq sai keletin ushaqtardy evakýatsiialaýǵa arnalǵan zamanaýi qural-jabdyqtar usynyldy. Atalmysh tehnika kez kelgen ushaqpen, sonyń ishinde eń iri Airbus A350 jáne Boeing 747-8 ushaqtarymen jumys isteýge qabiletti.
Sonymen qatar, áýejai órt sóndirý kólikteriniń álemdegi eń ozyq úlgileriniń biri – Rosenbauer Panther 6x6 elimizde birinshi bolyp Astana halyqaralyq áýejaiynda paida boldy. Ol Avstriiadaǵy Rosenbauer International AG zaýytynda óndirilgen jáne eń joǵary qaýipsizdik talaptaryna jaýap beredi. Bul oqiǵa ornyna tez jetip, kez kelgen tótenshe jaǵdaiǵa jedel áreket ete alatyn biregei tehnika.
Rosenbauer Panther 6x6 kóligi nebári 30 sekýndta 80 km/saǵ jyldamdyqqa jetedi, bul tótenshe jaǵdai aimaǵyna qysqa merzimde jetýge múmkindik beredi. Eń joǵary jyldamdyǵy 115 km/saǵ, bul ony óz klasyndaǵy eń jyldam kólikterdiń biri etedi. Órt sóndirý kóliginiń arnaiy dizainy 50%-ǵa deiingi eńisterdi eńserip, 30 gradýsqa deiingi búiirlik eńisterge tótep bere otyryp, tipti qiyn jerlerde de senimdi qozǵalýǵa múmkindik beredi.
Órt sóndirý úshin Rosenbauer Panther 12500 litrlik sý ydysymen, 1500 litrlik kóbikti rezervýarmen jáne 250 kg untaqpen sóndirý júiesimen jabdyqtalǵan. Sorǵy minýtyna 9 000 litrge deiin sý beredi, al aǵynnyń diapazony 100 metrge jetedi. Osynyń barlyǵy órtterdi múmkindiginshe tezirek oqshaýlaýǵa jáne yqtimal zardaptardy azaitýǵa múmkindik beredi.
Sonymen qatar, áýejaidyń apattyq-qutqarý qyzmetiniń jumyskerleri áýe kemelerindegi órtterdi sóndirýdiń túrli stsenariilerin jattyqtyra otyryp, arnaiy daiyndyqtan ótti. Mundai tehnologiiany engizý áýejaiǵa ushý qaýipsizdigin tolyq qamtamasyz etedi.
Bolashaq jańa sapa standarttarynyń enshisinde
2025 jyldyń qańtarynda Astana qalasynyń ákimdigi men «Terminals Astana Airport Management» JShS arasynda jańa senimgerlik basqarý sharty jasaldy. Qazirgi ýaqytta investor men qazaqstandyq tarap arasynda uzaq merzimdi investitsiialyq kelisim jasaý jumystary júrgizilýde. Óz kezeginde investor jolaýshylar aǵynynyń ósýin eskere otyryp, qoldanystaǵy ushý-qoný jolaǵyn qaita qurýdy, ekinshi ushý-qoný jolaǵyn salýdy, terminaldardy keńeitýdi jáne jańa terminal salýdy josparlap otyr. Sondai-aq investor áýejaidyń qazirgi infraqurylymymen jumys istep, aviakompaniialardy kóbirek tarttyryp, marshrýttar jelisin keńeitedi, sondai-aq jolaýshylar aǵynyn arttyrý boiynsha jumystar júrgizedi.
Aviatsiia kúni – elder men júrekterdi toǵystyratyn jandardyń merekesi
Astana halyqaralyq áýejaiynda jumys isteitin myńdaǵan mamannyń jumysy jolaýshylarǵa kórinbese de sapardyń sátti oryndalýyna múmkindik beredi.
Ómirin aviatsiiamen bailanystyrǵan barsha jandy quttyqtaimyz! Aspan ashyq, árbir reis sátti bolsyn!
