فوتو: nn-airport.kz
اۆياتسييا – بۇل تەحنولوگييانىڭ, دەلدٸكتٸڭ جەنە ادام ەڭبەگٸنٸڭ سينەرگيياسى. ەربٸر رەيس, ەربٸر سەتتٸ ورىندالعان رەيس – كٶزدەن تاسا بولسا دا, مىڭداعان ماماننىڭ ٷيلەسٸمدٸ جۇمىسىنسىز مٷمكٸن بولمايتىن نەتيجە. استانا حالىقارالىق ەۋەجايى – ەلٸمٸزدٸڭ ەۋە قوزعالىسىنىڭ جٷرەگٸ, مۇندا قاۋٸپسٸزدٸك, جايلىلىق جەنە تيٸمدٸلٸك بٸرٸنشٸ ورىندا.
اۆياتسييا كٷنٸ قارساڭىندا بٸز ەۋە قاتىناسىن ىڭعايلى ەرٸ سەنٸمدٸ ەتەتٸن جاندار, سايراپ تۇرعان ساندار جەنە جاڭا كٶكجيەكتەردٸ جاقىن ەتەتٸن ەۋەجايدىڭ دامۋى جايلى ايتقىمىز كەلەدٸ.
2000 مامان: تەۋلٸك بويى جۇمىس ٸستەيتٸن كوماندا
استانا حالىقارالىق ەۋەجايى – جولاۋشىلاردىڭ ەۋەدەگٸ قاۋٸپسٸزدٸگٸن قامتاماسىز ەتۋدٸ ماقسات تۇتقان 2000-نان استام جۇمىسكەرٸ بار ۇجىم. اۆياتسييالىق قاۋٸپسٸزدٸك قىزمەتٸ تەۋلٸك بويى ەۋەجايداعى جاعدايدى قاداعالاپ, ەربٸر جٷكتٸ مۇقييات تەكسەرٸپ, ەۋە كەمەسٸنە كٸرۋ مٷمكٸندٸگٸن قاۋٸپسٸز ەتەدٸ, كينولوگتار ىقتيمال قاۋٸپتەردٸڭ الدىن الادى. جەر ٷستٸ قىزمەتتەرٸ ەۋە كەمەلەرٸن ۇشۋعا دايىنداپ, مۇزعا قارسى ٶڭدەۋدٸ جٷرگٸزەدٸ جەنە ەۋە كەمەسٸنٸڭ اۋاداعى تۇراقتىلىعىنا ەسەر ەتەتٸن باگاج بالانسىن باقىلايدى. ديسپەتچەرلەر مەن رامپ-اگەنتتەر ەۋە كەمەلەرٸنٸڭ جەردەگٸ ناقتى قوزعالىسىن قامتاماسىز ەتەدٸ, ال ٶرت سٶندٸرۋ قىزمەتٸ تٶتەنشە جاعداي كەزٸندە دەرەۋ ەرەكەت ەتۋ ٷشٸن ەردايىم دايىن.
ەۋەجاي جۇمىسكەرلەرٸنٸڭ تىنىمسىز ەڭبەگٸنٸڭ ارقاسىندا 2024 جىلى 107 تىيىم سالىنعان زات جەنە تاسىمالداۋعا شەكتەۋ قويىلعان 27 552 زات انىقتالدى. كينولوگتار مەن قىزمەتتٸك يتتەر قاۋٸپ-قاتەردٸڭ الدىن الاتىن جەنە ۇشۋ قاۋٸپسٸزدٸگٸن قاتاڭ باقىلايتىن «كٶزگە تٷسپەيتٸن» ناعىز ساقشىلار. ەلوردا ەۋەجايىنىڭ ەرەكشە قاجەتتٸلٸكتەرٸ بار جولاۋشىلارى ەرقاشان نازاردا. بيىل استانا ەۋەجايى مٷمكٸندٸگٸ شەكتەۋلٸ 31 019 جولاۋشىعا قىزمەت كٶرسەتٸپ, ولاردىڭ جايلى ەرٸ كەدەرگٸسٸز قوزعالىسى ٷشٸن ەڭبەك ەتتٸ.
ايتارلىقتاي ٶسٸم مەن ماسشتاب
استانا حالىقارالىق ەۋەجايىندا جولاۋشىلار اعىنى تۇراقتى ارتۋدا. 2024 جىلى ەلوردا ەۋەجايىندا 8 315 108 جولاۋشىعا قىزمەت كٶرسەتٸلدٸ, بۇل ٶتكەن جىلمەن سالىستىرعاندا 11%-عا ارتىق كٶرسەتكٸش. ٸشكٸ ەۋە قاتىناسى 9 پايىزعا, حالىقارالىق - 16 پايىزعا ٶستٸ.
- - ٸشكٸ ەۋە تاسىمالى – 5 668 234 جولاۋشى (+9%).
- - حالىقارالىق ەۋە تاسىمالى – 2 646 874 جولاۋشى (+16%).
ساياحاتتاۋ ىڭعايلىراق بولىپ, باعىتتاردىڭ سانى كەڭەيە تٷستٸ.
ەۋەجايدا رەيستەر جيٸلٸگٸن ارتتىرۋ جەنە ۇشۋ گەوگرافيياسىن كەڭەيتۋ بويىنشا بەلسەندٸ جۇمىس جٷرگٸزٸلۋدە. ٶتكەن جىلى ەۋروپاعا, تاياۋ شىعىسقا, وڭتٷستٸك-شىعىس ازيياعا جەنە تمد ەلدەرٸنە ەۋە رەيستەرٸ قايتا جانداندى. ەلەمنٸڭ ٸرٸ قالالارىنا, سونىڭ ٸشٸندە ابۋ-دابي, سەۋل, تبيليسي, پراگا, سانكت-پەتەربۋرگكە, سونداي-اق كامران, بودرۋم جەنە پحۋكەت سيياقتى تانىمال تۋريستٸك باعىتتارعا ۇشۋ جيٸلٸگٸ ۇلعايتىلدى.
2024 جىلى العاش رەت دۋشانبە, فۋكۋوك, پحۋكەت جەنە ميلان قالالارىنا رەيستەر اشىلدى.
بۇل ٶسٸم قازاقستاننىڭ ترانزيتتٸك ەلەۋەتٸن دامىتۋعا, ەۋەجايدىڭ حالىقارالىق حاب رەتٸندەگٸ ۇستانىمىن نىعايتۋعا ىقپال ەتەدٸ.
جٷك تاسىمالى: جاڭا رەكوردتار
ەۋە لوگيستيكاسى ەۋەجاي قىزمەتٸنٸڭ ماڭىزدى بٶلٸگٸنە اينالىپ كەلە جاتىر. جىل ٸشٸندە 12 470 824 كەلٸ جٷك پەن پوشتا ٶڭدەلدٸ, بۇل ٶتكەن جىلمەن سالىستىرعاندا 39 پايىزعا ارتىق. بۇل رەتتە حالىقارالىق جٷك تاسىمالى 78%-عا ٶستٸ, بۇل جاھاندىق لوگيستيكادا ەۋەجاي بەدەلٸنٸڭ كٶتەرٸلٸپ كەلە جاتقانىن كٶرسەتەدٸ.
زاماناۋي ينفراقۇرىلىم – جاڭا مٷمكٸندٸكتەر
ەلوردا ەۋەجايى ۇشۋ قاۋٸپسٸزدٸگٸن بارىنشا قامتاماسىز ەتۋگە تاعى بٸر قادام جاسادى. استانا ەۋەجايىندا حالىقارالىق ستاندارتتارعا تولىق ساي كەلەتٸن ۇشاقتاردى ەۆاكۋاتسييالاۋعا ارنالعان زاماناۋي قۇرال-جابدىقتار ۇسىنىلدى. اتالمىش تەحنيكا كەز كەلگەن ۇشاقپەن, سونىڭ ٸشٸندە ەڭ ٸرٸ Airbus A350 جەنە Boeing 747-8 ۇشاقتارىمەن جۇمىس ٸستەۋگە قابٸلەتتٸ.
سونىمەن قاتار, ەۋەجاي ٶرت سٶندٸرۋ كٶلٸكتەرٸنٸڭ ەلەمدەگٸ ەڭ وزىق ٷلگٸلەرٸنٸڭ بٸرٸ – Rosenbauer Panther 6x6 ەلٸمٸزدە بٸرٸنشٸ بولىپ استانا حالىقارالىق ەۋەجايىندا پايدا بولدى. ول اۆستريياداعى Rosenbauer International AG زاۋىتىندا ٶندٸرٸلگەن جەنە ەڭ جوعارى قاۋٸپسٸزدٸك تالاپتارىنا جاۋاپ بەرەدٸ. بۇل وقيعا ورنىنا تەز جەتٸپ, كەز كەلگەن تٶتەنشە جاعدايعا جەدەل ەرەكەت ەتە الاتىن بٸرەگەي تەحنيكا.
Rosenbauer Panther 6x6 كٶلٸگٸ نەبەرٸ 30 سەكۋندتا 80 كم/ساع جىلدامدىققا جەتەدٸ, بۇل تٶتەنشە جاعداي ايماعىنا قىسقا مەرزٸمدە جەتۋگە مٷمكٸندٸك بەرەدٸ. ەڭ جوعارى جىلدامدىعى 115 كم/ساع, بۇل ونى ٶز كلاسىنداعى ەڭ جىلدام كٶلٸكتەردٸڭ بٸرٸ ەتەدٸ. ٶرت سٶندٸرۋ كٶلٸگٸنٸڭ ارنايى ديزاينى 50%-عا دەيٸنگٸ ەڭٸستەردٸ ەڭسەرٸپ, 30 گرادۋسقا دەيٸنگٸ بٷيٸرلٸك ەڭٸستەرگە تٶتەپ بەرە وتىرىپ, تٸپتٸ قيىن جەرلەردە دە سەنٸمدٸ قوزعالۋعا مٷمكٸندٸك بەرەدٸ.
ٶرت سٶندٸرۋ ٷشٸن Rosenbauer Panther 12500 ليترلٸك سۋ ىدىسىمەن, 1500 ليترلٸك كٶبٸكتٸ رەزەرۆۋارمەن جەنە 250 كگ ۇنتاقپەن سٶندٸرۋ جٷيەسٸمەن جابدىقتالعان. سورعى مينۋتىنا 9 000 ليترگە دەيٸن سۋ بەرەدٸ, ال اعىننىڭ دياپازونى 100 مەترگە جەتەدٸ. وسىنىڭ بارلىعى ٶرتتەردٸ مٷمكٸندٸگٸنشە تەزٸرەك وقشاۋلاۋعا جەنە ىقتيمال زارداپتاردى ازايتۋعا مٷمكٸندٸك بەرەدٸ.
سونىمەن قاتار, ەۋەجايدىڭ اپاتتىق-قۇتقارۋ قىزمەتٸنٸڭ جۇمىسكەرلەرٸ ەۋە كەمەلەرٸندەگٸ ٶرتتەردٸ سٶندٸرۋدٸڭ تٷرلٸ ستسەنارييلەرٸن جاتتىقتىرا وتىرىپ, ارنايى دايىندىقتان ٶتتٸ. مۇنداي تەحنولوگييانى ەنگٸزۋ ەۋەجايعا ۇشۋ قاۋٸپسٸزدٸگٸن تولىق قامتاماسىز ەتەدٸ.
بولاشاق جاڭا ساپا ستاندارتتارىنىڭ ەنشٸسٸندە
2025 جىلدىڭ قاڭتارىندا استانا قالاسىنىڭ ەكٸمدٸگٸ مەن «Terminals Astana Airport Management» جشس اراسىندا جاڭا سەنٸمگەرلٸك باسقارۋ شارتى جاسالدى. قازٸرگٸ ۋاقىتتا ينۆەستور مەن قازاقستاندىق تاراپ اراسىندا ۇزاق مەرزٸمدٸ ينۆەستيتسييالىق كەلٸسٸم جاساۋ جۇمىستارى جٷرگٸزٸلۋدە. ٶز كەزەگٸندە ينۆەستور جولاۋشىلار اعىنىنىڭ ٶسۋٸن ەسكەرە وتىرىپ, قولدانىستاعى ۇشۋ-قونۋ جولاعىن قايتا قۇرۋدى, ەكٸنشٸ ۇشۋ-قونۋ جولاعىن سالۋدى, تەرمينالداردى كەڭەيتۋدٸ جەنە جاڭا تەرمينال سالۋدى جوسپارلاپ وتىر. سونداي-اق ينۆەستور ەۋەجايدىڭ قازٸرگٸ ينفراقۇرىلىمىمەن جۇمىس ٸستەپ, اۆياكومپانييالاردى كٶبٸرەك تارتتىرىپ, مارشرۋتتار جەلٸسٸن كەڭەيتەدٸ, سونداي-اق جولاۋشىلار اعىنىن ارتتىرۋ بويىنشا جۇمىستار جٷرگٸزەدٸ.
اۆياتسييا كٷنٸ – ەلدەر مەن جٷرەكتەردٸ توعىستىراتىن جانداردىڭ مەرەكەسٸ
استانا حالىقارالىق ەۋەجايىندا جۇمىس ٸستەيتٸن مىڭداعان ماماننىڭ جۇمىسى جولاۋشىلارعا كٶرٸنبەسە دە ساپاردىڭ سەتتٸ ورىندالۋىنا مٷمكٸندٸك بەرەدٸ.
ٶمٸرٸن اۆياتسييامەن بايلانىستىرعان بارشا جاندى قۇتتىقتايمىز! اسپان اشىق, ەربٸر رەيس سەتتٸ بولسىن!
