Foto: QR TSM
14–16 tamyz kúnderi elordada taekvondodan (WT) Kazakhstan Open 2025 halyqaralyq reitingilik týrniri ótedi. Jarys Jaqsylyq Úshkempirov atyndaǵy jekpe-jek saraiynda uiymdastyrylmaq, dep habarlaidy Ult.kz.
Dúniejúzilik taekvondo federatsiiasynyń (World Taekwondo) resmi kúntizbesine engen bul týrnir úsh jas sanatyn qamtidy - jasóspirimder, jastar jáne eresekter. Búginde 750-den astam sportshy jarysqa qatysatynyn rastady.
Bairaqty dodaǵa Aýǵanstan, Armeniia, Kanada, Frantsiia, Úndistan, Iran, Qazaqstan, Kýveit, Qyrǵyzstan, Oman, Liýksembýrg, Marokko, Nepal, Pákistan, Palestina, Qytai, Saýd Arabiiasy, Túrkiia, Týnis, Birikken Arab Ámirlikteri, AQSh elderi jáne beitarap mártebedegi (AIN) sportshylar qatysady.
Kóp jyldyq úzilisten keiin Qazaqstan taǵy da álemdik taekvondo qaýymynyń nazaryn ózine aýdaryp otyr. Buǵan deiin elimizde G-1 deńgeiindegi halyqaralyq jarystar 2015 jyly (Almaty) jáne 2017 jyly (Atyraý) ótken bolatyn. Biylǵy jarys Qazaqstannyń halyqaralyq jarystar kartasyna oralǵanynyń aiqyn dáleli. Jarystyń mártebesin Olimpiada chempiondary men álemdik taekvondo juldyzdarynyń qatysýy aishyqtai túspek.
Týrnir jańartylǵan halyqaralyq erejelerge sai, KPNP K-2 júiesi arqyly ótkiziledi. Qazaqstanda alǵash ret sportshylardyń soqqylaryn dál ári ádil tirkeýge arnalǵan KPNP kompaniiasy usynǵan jańa elektrondy qolǵaptar qoldanylady. Sondai-aq, atalǵan halyqaralyq doda aiasynda alǵash ret Dúniejúzilik taekvondo federatsiiasynyń kórsetilim toby Qazaqstanda óner kórsetedi.
Atalǵan is-sharaǵa Dúniejúzilik taekvondo federatsiiasynyń prezidenti doktor Chýngvon Cho, Aziia taekvondo odaǵynyń prezidenti men World Taekwondo keńesiniń músheleri qatysady dep kútilýde.
Jarystyń jalpy júlde qory 15 808 000 teńgeni quraidy.
Kazakhstan Open 2025 tek sporttyq doda ǵana emes, sonymen birge Qazaqstannyń halyqaralyq jarystardy uiymdastyrýdaǵy áleýetin tanytatyn mańyzdy platforma bolmaq. Bul týrnir elimizde 2026 jyly ótetin Gran-pri finalyna daiyndyqtyń bir bóligi retinde jáne 2027 jylǵy álem chempionatyn ótkizýge usynylatyn resmi ótinim aldyndaǵy tanystyrý is-sharasy retinde qarastyrylady.
